Kolodyne Music Festival 2020 zo fel

Kolodyne Music Festival vawi khatna chu Zirtawpni leh Inrinni khan Kawlchaw khaw bula Chhimtuipui (Kolodyne) lui kamah neih a ni.

Zirtawpni chawhnu khan Festival hawnna hi neih a ni a, Lawngtlai DC Pi Shashanka Ala, IAS chuan Festival chu Chhimtuipui area-a mite a ṭha zawnga suih khawma ke pentirtu atana buatsaih a nih thu a sawo.

Siaha DC Pu Bhupesh Chaudhary, IAS pawhin thu sawiin a tira an suangtuahnaa mi tuna a taka hmuh theih a lo ni ta leh mipuiin an hlutpui em em chu lawmawm a ti hle.

Kolodyne Music Festival hi district pahnih - Siaha leh Lawngtlai mipuite tana buatsaih niin, Organising Board-ah pawh district pahnih atangin ai awh eng emaw zat indah ve ve a ni. He hunah hian Magdalene, Shai Hills, G'Nie, Fiona Pachuau, Kimkima leh Francis-te bakah, tualchhung zaithiam - John Beizachhi Phuto, Silver Flame(Tipa), Young Lai Music, Ade, Suzerain, Lone Sister, Mercy, Jessica B Khuhly, Sharon, Holy Grail, Asylum, Kurapia, John Manaha, Project KMF Band leh Lunglei atangin Assam Rifles Band-te an inlan a, Siaha Meisavaih 'W' Branch MTP leh Lawngtlai College Veng Branch YLA-te'n hnam lam an entir bawk.

Music concert bakah hian ei tur leh hnam thuam chi hrang hrang zawrh­na stall hawn a ni a, a duh tan Chhimtuipuiah lawnglenga chuan theihna tur buatsaih a ni bawk. Luia che sual an awm loh nan Kawlchaw W Branch YMA leh Kawlchaw E Branch MTP-te an duty reng a ni.

He festival hi thu­pui pathum- #Zero­WasteManagement, #SayNotoDrugs leh #SayNotoPlastic hmanga buatsaih a ni.