Khiangte Construction Ṭhazual Gospel Chart chung berah Arini "I tel lo run dai"

Khiangte Construction Ṭhazual Gospel chart-ah Praise On 2016 winner R. Lalrinmawii (Arini) hla "I tel lo run dai" chu a chung berah a rawn inhlangkai ta. Arini hian chart-ah hla pahnih lanpui theiin kar liam ta lawka a tihchhuah "Sual hnehna" chu top 10-ah hian a rawn lang bawk a ni. Hla phuahtu leh music siamtu hi Peka a ni a, recording hi Masky Records-ah neih a ni thung. He hla hi Arini YouTube Channel "Arini Ralte" tihah ngaihthlak mai theihin a awm a ni.

Pahnihna leh Pathumna

Mipa gospel artist chuai thei lo, R. Lalbiaksanga'n mawi taka a sak "Ka thlir bang lo" chu pahnihna a ni. Zoram rimawi khawvela sulhnu ngah tak, Lal K Sailo chuan ama hla phuah "Kulhbing sang" chu pathumnaah a rawn lanpui bawk.

Chart a ngaihnawn chho zel

Dinai C. Lalruatdiki'n thiam taka a sak, "Ka lo hre ta," chu palinaah awmin, Dinai hi mi tam zawk chuan la hmelhriat lo mah ila, thlir bik tur zinga mi leh, pakhatna ni thei tur pawha dinhmun ṭha taka ding a ni. Panganaah hian C. Zothanmawii hla, Mizoramin Covid hripui leh laia hun harsa a paltlang dan hla thu hmanga a tarlanna "Ka damna" chu top 5 huangah a rawn lang a ni. Heng hlate bakah KNP, Rawpui Unit, Mama Khiangte, Zoremtluanga Khiangte leh Lalnuntluangi (Nupuii)-te chu chart-a lang dangte an ni.