Film pathum aṭanga USD tld 2 chuang ṭheuh la lut thei James Cameron

Avatar: The Way of Water chu beisei angin a che ṭha chhunzawm zel. Sci-fi movie, 'Avatar 2' tlangzarh a nih aṭanga kar ruk hnuah USD tluklehdingawn 2 chuang a lalut tling ta a, Covid-19 hripui len hnua mellung pawimawh phun leh thei hmasa ber a ni.

Avatar chhunzawmna hian US bikah USD mtd 598 lalut tawhin, khawvel huap theatre-ah USD tld 1.4 chuang a lalut tawh bawk a, tihian a sum lakluh belhkhawm chu USD tld 2.024 lai a tling ta a ni.

Hetih lai hian, James Cameron kaihhruaina hnuaiah film pathum "Titanic", "Avatar," leh "Avatar: The Way of Water"-te chuan USD tld 2 chuang an lalut tling tawh a, film director zingah hetiang zat sum lalut thei an awm lo a, mi bik a nihzia a rawn nemnghet nawn bawk a ni.

Hei bakah, "The Way of Water" hi USD tld 2 lalut rang pahnihna leh, sum lakluh tam lamah parukna a ni mek bawk a ni. "The Force Awakens" (USD tld 2.07) leh "Infinity War" (USD tld 2.04)-te chu kar loah a lehpel leh mai tura rin a ni bawk.

Tute nge lo lang?

Hollywood naute thar 'M3GAN' pawhin mi lawm a hlawh vak tawh lo niin a lang a, pathumnaah a tla thla. USD mtd 11.5 laluttu "Puss in Boots: The Last Wish" chu pahnihnaah a rawn inhlangkai thung. Kum 2018-a tihchhuah "Searching" chhunzawmna mystery thriller film, "Missing" kan hmu thar a, Hollywood actor ṭha mi, Tom Hanks channa "A Man Called Otto" chu pangana a ni.