Sorkar laipuiin Social media Influencer-te tan inkaihhruaina tichhuak: Dan zawm lo te'n Rs nuai 50 thleng chawi thei

Tunlai thiamna ṭhang mek karah, India ram sorkar laipui chuan kar liam ta Zirtawpni khan social media influencer-te tan inkaihhruaina thar a tichhuak. He dan thar hnuaiah hian influencer-te chu an brand fak sak te nihna dik tak tarlang ṭhin tur te, thup ṭhen nei lo tur leh, langtlang taka thil kalpui ṭhin turin a chah bakah consumer-te himna ngaihtuah reng turin a ngen. Inkaihhruaina dan thar zawm lo te chu cheng nuai 50 thleng chawi emaw kum ruk thleng product fak thei lo tur emawa hrem theih an nih thu an tarlang tel.

Sorkar chuan advertisement kaltlanga inbumna tihtlem tuma a hmalakna kalzel pakhat a nih thu sawiin, social influencer market ṭhang chho zelah consumer-te venhimna pawimawh tak a ni thei dawn a, he market hi kum 2025-ah chuan 20% a ṭhang chho tura tih niin, Rs vbc 2,800 chuang pawisa hi virvel tura chhut a ni bawk.

He inkaihhruaina thar hi a hmingah 'Endorsement Know Hows - for celebrities, influencers and virtual media influencers (Avatar or computer generated character) on social media platforms' tih a ni a, Department of Consumer Affairs thuhnuaiah a awm ang. He kaihhruaina hian a huam zau dawn hle a, mipui ṭhahnem tak hip theihna nei leh be tlang theite thlengin a huam dawn a ni.

Central Consumer Protection Authority (CCPA) chuan manufacturers, advertisers leh endorsers-te chungah Rs nuai 10 thleng a chawitir theih bakah, dan hi an bawhchhe nawn fo a nih chuan Rs nuai 50 thleng an chawi belh thei bawk ang.

Covid-19 hripui len hnuah social media kaltlanga thil zawrhte hi a hluar hle a, hei hi hriain social media-a mimal, product leh bungraw dang zawrh hi a pung zel dawn tih chiang takin a lang a, inbumna leh intihderna lam chi a thlen fo lohna turin dan felfai tak kenkawh zel a ni ang tiin, Consumer Affairs secretary Rohit Kumar Singh chuan a sawi.