"Ka single e," a tih hnuah Selena leh Drew an chhuak dun leh!

Selena Gomez-in The Chainsmokers duo zinga mi, Andrew Taggart nen an inkara sawi awm chungchang chu January 19 khan a IG story-ah "Ka single e," tia chiang taka a chhan hnuah, January 21 zan khan an pahnihin New York khawpuia Italian restaurant, Torrisi-ah an chhuak dun lai chu hmuh leh an ni a, hei hian rinhlelhna dai tawh chu a rawn chawk tho leh a, khawthlang media-te mitfukna an ni leh mek.

Us Weekly chuan nimin khan 'Only Murders in the Building' star leh DJ-te'n hun hlimawm tak an hman thu a rawn tarlang leh bawk a, an inngaihzawnna hi hmun kilkhawr leh mi tlawhpawh theih lohna hmunah hman kher an tum lo niin a tarlang. Selena hian a ngaihzawng chungchang hi vantlang hriatah a pholang chiam ngai lo a, kum eng emaw zat kal ta khan a zaithiam pui pahnih The Weeknd leh Justin Bieber-te a zui hnuah chanchin a nei khat hle a ni.