Chris Tomin-a'n ‘Chris Tomlin & Friends’a tlangzarh ta

Christian music artist lar Chris Tomlin chuan a studio album 13-na  ‘Chris Tomlin & Friends’ chu Zitawpni liam ta khan a tlangzarh ta a, streaming service hrang hrangah ngaihthlak turin a awm tawh.

‘Chris Tomlin & Friends’-ah hian hla 13 a awm a, Gospel singer ni kher lo mi lar hrang hrang a thawhpui a, chung zingah chuan Florida Georgia Line leh Lady A(Lady Antebellum)-te pawh an tel. Anni bakah hian Thomas Rhett bakah country music artist lar Russell Dickerson, Chris Lane, RaeLynn, Cassadee Pope leh Brett-te a thawhpui a, NEEDTOBREATHE member Bear Rinehart leh Blessing Offor leh We The Kingdom-te pawh a thawhpui bawk.

"He album hi zaithiam dang ka thawhpuina a ni satliah lo a, chutiang album chu tam tak a awm tawh a ni. Mahse he record hi chu thawhhona lam a ni zawk. Ka thil tum pakhat chu rimawi hi mi tam zawkin an ngaihthlak theih a ni a, ka thlir danah chuan, rinna, Pathian, chhandamna leh inngaihdam lam hawi music hi genre pakhat aṭang chauha puanchhuah tur a ni lo," tiin a album thar chungchang hi a sawi a, "He album hian dan a nei lo a, chu chu thil mawi tak a ni," a ti.

Tomlin hian album a tlangzarh hma hian a album thara hla eng emaw zat hi single-in a tlangzarh tawh a ni. Zirtawpni aṭang kha chuan a album-a hla zawng zawngte hi streaming service hrang hrangah a ngaihthlak theih tawh a, Christian music huangchhungah chuan hla ngaihthlak hlawh ber an nih chhoh leh ngei a rinawm