Paris Fashion Week mit latu Doja Cat leh Kylie Jenner

Designer kei ka ni inti chinin an kutchhuakte an phochhuahna, khawvel huap pawha Fashion Week ngaihhlut ber pawl leh, kum khat dana neih ṭhin 'Paris Fashion Week' chu neih chhoh mek zel a ni. Nimin khan, Kylie Jenner chu sakei baknei (Lion) lu chuanna "Schiaparelli gown" nen ring taka hahum chungin a rawn inlan a, American rapper, singer-songwriter leh record producer Doja Cat chuan Swarovski Crystals 30,000 chu a chhip aṭanga a ke ler thleng inbelin a rawn sen mawi dangdai hle.

Kylie incheina hian sawizui a hlawh nghal hat a, a siamchhuaktu chuan, "Foam, wool leh silk faux hmul lakhawmin, a tak ang thei ang ber tura kan duan a ni. He thuam kan siam hian ramsa tumahin hliam an tuar lo e," tiin an sawiselnate chu a chhanglet.

Doja-i makeup artist, Pat McGrath chuan rapper chei nan hian darkar 4 leh minute 58 zet hun a hman thu sawiin, grammy winner dawhtheihna leh inpekna zarah an kutchhuak mawi taka a lanchhuah phah thei tih a sawi.

Fashion Week ngaihlut chu..

Paris Fashion Week hi France khawpui Paris hmun hrang hrangah nghah a ni ṭhin a, spring/summer leh autumn/winter event-ahte ṭhen hran an ni. Fashion Week neih hun mumal tak hi a awm lo a, French Fashion Federation chuan a ni hi a puang mai ṭhin a ni. Kumtinin khawvel huap brand lar Dior, Chanel, Louis Vuitton, Kenzo, Givenchy leh Céline-te'n anmahni pualin khawpui hmun hmingthang tak tak - Carrousel du Louvre leh Grand Palais-ah te an nei ṭhin a ni.

Paris Fashion week hi incheina huangah "Big 4" zingah chhiar tel an ni a, London Fashion Week, Milan Fashion Week leh New York Fashion Week-te hi a lianzual palite an ni. New York aṭanga inṭanin, London-in a dawt a, Milan chuan chhunzawmin Paris-ah a tawp ṭhin a ni.