Billboard 200 chart-ah kar 6 chhung SZA 'SOS' pakhatna
American singer-songwriter Solána Imani Rowe, SZA tiha kan hriat lar chhoh mek chuan Billboard 200 albums chart a thunun hneh hle a, kar ruk chhung zet chu pakhatna dinhmun hi a hauh ta.
"Kiss Me More" hitmaker album thar hian US bikah equivalent album 1,19,000 hmuchhuak lehin, a ni tluk zo an la awm lo a ni.
R&B/hip-hop album hlawhtling ber a ni thei dawn em?
Drake-a'n kum 2016-a "Views" album a tlangzarh hnua Billboard 200-a R&B/hip-hop album No. 1 ni rei thei ber chu "SOS" hi a ni. Chu mai a la ni lo, kum 2004 daih tawha Usher-a'n "Confessions" album a zawna kar kua zet pakhatna a nihpui tawhna record-te pawh kha a hnaih tawh hle a, tiang zela a kal a nih chuan "SOS" hian record thar duhawm tak a siam thei dawn a ni.
Chart a danglam tam lo
Billboard 200 chart top 4 hi kar hmasa lang ngaite bawk kha an ni a, Taylor Swift, Metro Boomin, Drake & 21 Savage-te'n an dinhmun ngai ṭheuh an luahlum leh. Panganaah hian The Weeknd compilation album "The Highlights" chu 36-na aṭangin a rawn invawrh chho dawrh a, Latin rapper ṭha mi Bad Bunny, American country singer&songwriter Morgan Wallen bakah, Zach Bryan, Lil Baby leh Harry Styles-te hming kan hmu leh bawk.