Taylor Swift-in a album thar hmangin record a siam leh

Taylor Swift chuan a album thar 'Folklore' chu a hlawhtlinpui chho zel a, kum zabi 21-a UK album chart-a studio album panga no.1 ni thei hmeichhe awmchhun leh a hmasa ber a ni.

"Love Story' hitmaker hian kar hmasa khan a studio album pariatna 'Folklore' hi a tlangzarh thut a, a fan-te chu inpuahchah hman lo mah se a album a tlangzarh chiah hi an stream nghal mawlh mawlh a,  streaming service lian pathum Spotify, Apple Music leh Amazon Music-ah darkar 24 chhunga stream tam record a siam vek a, tunah record thar duhawm tak a siam leh ta bawk a, American Music Awards-in  Artist of the Decade atana an thlan chu a phu zia a lang chho ta zel niin a lang.

UK-ah chuan kar khat chhungin 'Folklore' hi copy 37,060 a hralh hman a, album hralh kal ber a nihpui lehnghal a ni. A hmain Red, 1989, Reputation leh Lover-te kha No.1 a lo nihpui tawh bawk. Kum 2006-a a album hmasa ber, Country music album 'Taylor Swift' a tlangzarh aṭanga vawiin thleng hian a lar a la chawl lo a ni ber. A album thara hlate hi single chart-ah pawh an che ṭha hle a ni.