Mipuite hlawk nan TATA MOTORS leh MRB thawk dun dawn

Hlawkna an hmuh ve ve inbeiseiin Tata Motors Limited (TML) leh Mizoram Rural Bank (MRB) an thawk dun dawn a, Mizo mipui tan hamṭhatna a nih ngei an beisei.

Thawhlehni zan khan Aijal Club-ah TML North East State hotu Kingsuk Maitra leh MRB chairman V Jayachandra chuan inremna thuthlung an ziak fel. India rama lirthei siamtu company hausa berin Mizoramah thuthlung ziaka thawhpui a neih hmasak ber a ni.

Bank dawra buaipui vak ngai loin MRB-ah loan lain Mizoramah Tata siam sumdawnna lirthei a lei theih tawh dawn a : Rs nuai 10 chin hnuai lam man lei tur tan dahkham neih a ngai lo a, a man zat aṭanga 10% chin pein a dang 90% chu loan hmanga rulh tur a ni dawn a, a rei ber thla 66 chhung tur niin lirthei lak chhuah tirh aṭanga thla ruk chhung erawh rulh ngai loa insawhngheh hmasakna hun pek theih an ni ang. Rs nuai 10 chung lamah sorkar hnathawk tan harsatna a awm lo a, ni ve lo tan dahkham a ngai a, chuti a nih loh chuan guarantor rin tlak emaw loan Rs nuai 40 chin la thei nih a ngai. A man zat aṭanga 10% chin pein lirthei a lak chhuah aṭanga thla ruk chhung chu loan a rulh tur pe nghal kher loin a awl lailawk thei dawn a, a rei berah thla 66 chhung rulhna hun pek a ni ang.

Jayachandra chuan, "Kan bank tan hun chhinchhiah tlak a ni a. Tata nena kan thawh dunna hi thil ṭha leh pawl pahnih tan hlawkna tur a nih bakah, Mizo mipui tan hna tam zawk siam chhuahna tur leh awlsam zawka eizawnna a inhawn phah ngei ka beisei," a ti.

September 27, 1983-a din MRB hian branch 101 hawng tawhin Mizorama ngah ber, district tin huap zoa thleng thui leh huam zau ber a ni. Hnathawk 500 vel awmin thingtlang miten an chhawr ṭangkai lehzual.

Maitra chuan, "Mizoramah Tata Motors tan MRB aia thawhpui tur ṭha a awm chuang lo. Mipui tan loan lak a awlsam phahin a rulh leh dan turah hahdam zawkin kalpui a ni dawn bawk a, thingtlang mite huap zoin kan lirthei hmanga sumdawng leh eizawng an tam phah bakah, a huam kim leh zual ngei dawn a ni," a ti.

He inremna hi TML hnuaia sumdawnna lam lirthei zawrh chhuahna bik atan tih a ni. Mizoramah Tata Motors commercial dealer pakhat, Zothan Autoworks awmin hnathawk 140 vel an awm a, an hmunpui Aizawl bakah Lunglei, Champhai, Siaha, Lawngtlai leh Kolasibah an inzar pharh tawh a ni.

Zothan Autoworks neitu, Zothantluanga chuan August 2015 aṭangin dealer nihna an kalpui ṭan thu leh, tun thlengin Mizoramah lirthei 6,000 vel an hralh chhuak tawh tih a sawi.