AMAWII tlangzarh hun a hnai

Zote Entertainment buatsaih, "AMAWII" film chu February thlaah release tura buatsaih chhoh mek a ni a, he film hi nikum aṭang khan shooting hi neih ṭan tawh a ni.

Zote Entertainment hian kum hmasa lawk khan "KA U LIANA" film a lo tichhuak tawh a, film hit leh mi fak hlawh tak ni chhoin, Runmawi Special Award ' BEST SELLER ' niin, hei bakah hian Lunglei Runmawi Award ah 'Best Film' atana thlan chhuah zingah a tel. Aizawl lam aṭanga film lang awmchhun a ni nghe nghe.

AMAWII hi "Ka U Liana" film director Mike-a'n a direct leh a, script pawh hi ama ziah a ni. Asst. director hi Aruata Fanai a ni a, Director of Photography atan hian Ruattea Photography chuan mawhphurhna a rawn la ve leh thung a ni.

Script

AMAWII hi chhungkaw pahnih in ang lo tak tak chanchin a ni a, zu in chhungkua, khawtlang leh thlarau nun thlenga a nghawng nasat theih zia pholanna tur film a ni. Mizo Society leh Mizo rilrem theihdan tur bera ziah a ni a, a tak tak behchhana siam leh buatsaih a nihna hian film a tihlu zual hle tura ngaih a ni.

Story tluangtlam tak ni siin, a film-ah hian thil tam tak buaina leh harsatna, manganna phena Pathian hnathawhdan danglam tak zeh luh a ni dawn a ni. Gospel film ni chiah si lo, Gospel film-a rin luh a nih theihna lai awm siin a rawn kual dawn.

Tute nge chang dawn?

He film-ah hian mi thar tam tak bakah lemchan khawvela kan hmelhriat tawhte leh zaithiam, designer thlengin an rawn inlan pawlh nuk ang. "Ka U Liana"misual lema chang thiam em em mai, Ruthi Chenkual chu he film-ah hian a rawn inlan leh dawn a, "Kantu Express" aṭanga kan lo hmelhriat Pi Machhungi kan hmu dawn bawk. Zote Entertainment film buatsaih tho "Nutei Thingpui Dawr" a misual lema chang kha a changtupa ber a rawn ni thung dawn a, Feli Ralte, Maneihi Fanai-te leh, Lalhmangaihsangi te an rawn inlan dawn a, a hmuhnawm loh ring suh. Mizo Idol aṭanga mipuite star rawn David Darlong pawh a inlan dawn a, a fans-te tan chuan hmaih phal chi a ni lo ang. Writer kuthnu ngah tak, Aaron Malsawmdawngzuala pawh kan hmu dawn a, designer lar Tluangpuii Hmar te, YouTuber Misualpa MPA te hian eng role nge an chan dawn tih pawh hriat a chakawm tawh hle.

Engtikah nge an tlangzarh dawn?

Amawii hi RUNMAWI APPS aṭanga en theih tura chhawpchhuah a ni dawn a, RUNMAWI hian an co-produced nghe nghe a ni. February 11, 2023 zanah Vanapa Hall-ah release a ni dawn a, hemi zan aṭang vek hian Apps lamah lei theihin chhawpchhuah ve nghal a ni bawk ang.