Vanglaini Bihchianna

Entrepreneur Huang : Thingpui tui leh danglam bik siamtu

Zo Inn

ZoInn hi kum 2021 March thlaa din ṭan niin, a tirah Masala Tea chauh hmangin bul an ṭan a, kum khat chhung chu Masala Tea chauh siamin hun an hmang. An sumdawnna huang zauhin kum 2022 aṭangin herbal tea blend dang 'Hibiscus flower herbal tea', 'Bluepea Lemongrass herbal tea' leh, 'Lavender herbal tea'-te an siam chhunzawm leh a ni.

Sumdawnna bul ṭan dan

Business background hranpa an nei lo. Thingpui hi miin an tih zen zen loh, demand sang thei tur leh nitin mamawh, ral zung zung tur (Fast moving consumer goods) lam an ngaihtuahin an thlang a ni. Risk la in, thingpui tui leh danglam, miin an la tih ngai loh deuh hleka siam chhuah duhin MASALA TEA hmangin bul an ṭan a, tun thlenga an product hralh tla ber a ni zui bawk.

"He masala tea bik hi tun thleng hian kan sales ṭhat ber leh miin an duh ber a la ni reng a, a flavour tur hi vawi 10 vel lai chu kan siam chhin. A chang in Spices ṭhenkhat langsar deuh te, a chang a duh anga rim tui lutuk lote in kan ti ve nawk nawk ṭhin. Mahse tunah a ṭha ber tur leh mipui tam zawk rilrem tura kan beisei danin a flavour inpawlh dan kan tichhuak thei ta a ni," an ti.

An thil tum ber:

An dah pawimawh ber chu Customer Care a ni. Customer-te nen inlaichinna hi tih ṭhat ber an tum a; an duhdante an rawn sawi a, zawhna an neihte anmahni ngaihpawimawh a, an duhna leh beiseite tihhlawhtlin sak zel theih an tum. Dawhthei zawk leh ngaichangtu zawk nih zel hi sumdawnnaah chuan a pawimawh berah an ngai. "Sumdawnnaah kan product zawrh tluk zeta pawimawh chu kan customer-te nen a kan inkar hi a ni kan ti lo thei lo" tiin Vanglaini an hrilh.

Hnathawk chhawr:

A nghet-a thawktu chhawr an nei hran lo. Mahse anmahni puitute chu thla bi anga hlawh pe lo in, an hnathawh zatin share angin an pe ṭhin. Hnathawkte hi a tiphur thei tura ṭhahnem tawk pek zel hi an tum tih sawiin, hei hian sumdawnna kawngah pawh rei a kalpui theih zawk an beisei. A neitu lamin hlep hnem bik zawk ai chuan a huhoa a hlawkna tel zel a insemzai zel hi an thupui a ni.

Distributor chungchang:

Dawr hranpa nei loin in lam aṭangin an pe chhuak ṭhin. Dawr 30 velah dah tawhin, Mizoram district hrang hrangah stock point-te neiin, state pawn Nagaland lamah hian startup lam buaipuitu 'ILANDO' te'n an zawrhpui bawk. State pawnah Masala tea leh Hibiscus hi an thawn hnem ber pahnih an ni. Instagram lamah hian ZO_INN_ tiin an nei a, hemi aṭang hian order hi an hmu tlangpui. Mimal leh pawl anga zuar duhte hnenah dawrkaite nen hlep in ang reng turin an pechhuak ṭhin bawk.

Packaging chungchang:

Packaging hi a tam zawk chu Mizoram aṭang veka buaipui a ni a, phai lam aṭanga chah luh a awm bawk. Packaging man a insen ṭeuh loh a, tlawm leh ṭha si a chhawpchhuah theih an tum. Thingpui packet sticker leh design hi anmahni tih vek niin, brand logo erawh @hildart_13 in a tihsak thung.

Hmachhawp:

Thingpui product tam zawk leh flavour dangte rawn siam chhuah zel an tum. Mizoram mai ni lo, vai ram lam aṭang pawhin thawhpui tur an be mek. Flavour danglam deuh, midangin an la tih tam loh an ngaihtuah mek tih an sawi. Thingpui business bakah hian Resort anga hman theih tur, ṭhian zaho emaw chhungkua emawa intihhlimna tur hmun hi an brand hming, Zo-INN tiin an siam mek bawk a, kuminah peihfel hman an tum. Thingpui emaw eitur emaw lam ni kherlo, Mizo kutthemthiamte thilsiam dang pawh rawn chhawpchhuah sak zel an tum bawk a, hetiang lam thiam bik nei an awm chuan a MARKET lam buaipui sak theih dan kawng an zawng mek bawk.

Sum lakluh lam:

Sum lakluh dan hi a danglam fo. Hralh ṭhat em em ṭum a awm laiin reh deuh hlek ṭum te a awm. A zat chiah hi chu sawi a har a, mahse hna ang tak taka buaipui ngai leh buaipui tham khawp, eizawnna tling tawk tak chu a ni chho zel. Chawhrualin thla khatah Rs nuai 1 bawr vel lalut ziah ang an ni. "Mizo mipuite'n min ngaihlut sak zar kan zo ve zel ti ila kan sawi sual lo ber awm e. Tin, sum tluk zet a kan ngaihhlut, midang nen a kan inlaichinna kawngah te, hmelhriat ṭha tak tak min duhsak em em tute kan tawng zel hi keini chuan kan sum lakluh tluk zetin kan ngaihlu a, kan eizawnna avanga midang nena kan inlaichinna siam hi man a lei tur ni se kan lei phakloh tur a tam ve tawh khawp mai," an ti.

Harsatna tawh te:

Startup hi an ṭan ve chauh vangin harsatna neuh neuh hi a tam ve ṭhin. A product ṭhenkhat hi Herbal a nih avang leh, mi hrang hrang aṭanga lakkhawm ṭhin a nih vang hian quality chungchangah fimkhur a ngai ṭhin hle. Product ṭhenkhat, duh anga quality ṭha lo deuh si, a dahna hmun leh a laknate fimkhur tawk loh avanga chhe hman te a awm ve leh ṭhin a, hei hi sutkiang tumin ṭan an la mek.

Product supply shortage hi an buaina pakhat a ni bawk. Product ṭhenkhat duh ang zat an pek theih loh leh, supply lam bahlah a awm ve ṭhin. Heng vang hian production leh marketing lam an tih nasat theih loh phah fo. Hei bakah product zawrh chhuah theih tak siloh tam tak a awm a, supply lam vanga an duhkhawp ang hmuhloh awm ṭhin chuan harsatna lian tak a thlen bawk.

Entrepreneurship chungchang:

"Entrepreneurship hi kan tan chuan thil thar a ni a, thiamna leh skills hran em em nei lawk loa zuanglut kan ni. He zinkawngah hian mi tam tak duhsakna kan dawng a, nitin mai hian thil thar kan zir belh ve reng a ni. Heng kawnga min kaihruai a, thu ṭha min hrilh a, kawng dik min kawhhmuhtute chungah thinlung takin lawmthu kan sawi nawn leh a. Kan hmachhawp leh hmalakna zel turah in mi duhsakna kan rawn ngen nghal a ni," tiin Vanglaini an hrilh.