Padma Shri Rûnremsangi'n Hnam làm leh zai humhalh zel turin mipui a chah
Art (zai leh lâm) lama a thawh hlâwk avanga Padma Shri dawng tur KC Rûnremsangi (Masangi) chuan, Mizo hnam làm leh zaite hmusit lo a, humhalh a, chawi nung zel turin Mizo mipui, a bikin ṭhalaite a chah.
Padma Shri dawng tura thlan a nih hnua Vanglaini palaiin a kawmnaah KC Runremsangi chuan, Mizo hnam thil, zai leh lâmte humhalha chawi nun zel ṭul a tih thu a sawi a, "Mizo kan ni a, kan hnam làm leh zaite hi kan ngaihlu reng tur a ni. Ṭhangtharte hian ngaihsan lohna te, hmuhsitnate an nei ṭhin niin ka hria a, kan hnam làm leh zaite hi i hmusit lo ang u. Keini'n kan humhalh loh chuan tu ma'n min humhalhsak dawn lo a, kan ngaihluin kan humhalh tlat tur a ni," a ti.
Bul ṭanna
Zai lama a bul ṭan dan sawiin Masangi chuan, "Naupang têt aṭangin ka zai a, sunday school-ah te, YMA thil tihnaahte naupang leh tleirawl te ni chungin ka zai a, kohhran inkhawmpuiahte naupang te niin ka zai ṭhin," a ti a, Pathian khawngaihna avangin tun thlengin chàwl loa a la zai zel thu a sawi.
KC Rûnremsangi hian BA a zir laiin zai tura an hruai nasat avangin BA a zir zawh loh phah a, a hun hmasa lamah chuan Congress party-in an hruai nasa hle. Mizoram hmun tin hmun tangah zaiin a zin kual a, "Zoram dung leh vâng ka zin kual chhuak tak meuh," a ti.
German rál rûn zai
Pi Masangi'n a sak tam ber chu 'German rál rûn zai' a ni. He hla hi sak loh theih loh a nih ṭhin thu sawiin, "Khawiah pawh kal ila, hla dangte pawh sa ve ṭhin mah ila, German rûn zai ka sak loh chuan a kim lo, an ti a, min saktir tho tho zel a, ka sa lo thei lo a ni ber," a ti.
Hnam hla & Pipu zai
Mizo hnam hla leh pipu zaite hi a vahvaihpui ve nasat thu sawiin Masangi chuan, "A mawi emaw, mawi lo emaw, ka sa hrim hrim zel. India President ṭhin APJ Abdul Kalam a rawn zin ṭum pawhin seki leh khuang nen chauh ka sa a, min hlutsak ve hle nghe nghe," a ti.
KC Rûnremsangi hian a pate'n sa lú an lâma an zai ṭhinna aṭangin Mizo pipu zai a hmelhriat ṭan a, Art & Culture department-ah a luh tâk bawk avangin a sa tak tak zui ta a, "Ka sak thiam zawng takte a lo ni aniang, ka tui chho tak tak ta a. Pathian hla kan saka kan tui ang tak tak hian ka sa tui ṭhin a, rilru tak tak hian ka sa niin ka hria. Rimawi nen a ni emaw, seki nen chauh pawh ni se, nuam ka ti em em a, a mood-ah ka chêng hle ṭhin," a ti.
Hnam hla leh pipu zai sain Mizoram páwnah pawh a zin nasat thu sawiin, "Kum 2000 emaw ni khan North Korea-ah India ram aiawhin kan kal a, German rûn zai hi ka han sa vang vang tawh," a ti a; India ram chhunga khawpui hrang hrangah Mizo pipu zaite a sak ṭhin thu a sawi bawk.
Hla phuah lam
KC Rûnremsangi hian hla pali/panga vel chu a phuah ve a, a audio album-ahte pawh a telh a, mahse, hla lâr tak an ni lem lo thung. "Keima'n ka sa a, mi dangin an sa lo. Ka hla phuah ve a nih avangin ka duh ve viau a, ka ngaihlu khawp mai. Ṭhiante ngaihna lam leh khawtlang lunglèn lam hla a ni ber," tiin a sawi.
Chawimawina
KC Runremsangi hian pipu zai leh Mizo hnam hla ang chi a sa nasa a, a tilartu, chhawm nungtu leh tihmasawntu pawimawh tak a nih avangin Sangeet Natak Academy Award 2017 a lo dawng tawh a, February 6, 2019 khan hlan a ni. Heng avang bawk hian India rama civil mite chawimawina sang Padma Shri dawng turin thlan a ni ve leh ta a. Mizoram chhung bikah chawimawina ṭhahnem tak a dawng tawh bawk.
Padma Shri a phû em?
Padma Shri dawng turin phu a intih leh tih loh zawhna chhangin Masangi chuan, "Kei chuan phû ka inti lo a, ka la ngaihtuah ngai loh thil a ni. Mahse, pipu zai leh Mizo hnam làm leh zai hi ka vahvaihpui nasa ve a, kei aia vahvaihpui nasa an tam bik kher lo ang; humhalha chawi nung turin theihtawp ka chhuah ve a, chu'ngte chuan an phú em tih chu ka hrethiam bik lo," a ti.
Chhungkua leh sûlhnu
Keiṭum khuaa Lalawia leh Lalengi te fa hming koh KC Rûnremsangi hi unau pariat zinga mi a ni a, kum 2003 khan Lalthanmawia nen inneiin, fanu pakhat an nei a, Bawngkawn South-ah an cheng mek. Kum 1992-ah Art & Culture department-ah lâm zirtirtu (dance instructress)-in a lut a, tun thlengin a la thawk a ni.
Masangi hian audio album pariat a siam tawh a; a album hmasa ber chu lénglâwng lam hla niin, kum 1986 khan a tichhuak a, folksong album pakhat a siam bawk a, a bâk zawng chu Pathian hla, léngkhawm hla leh Good Friday lam hawi hlate a ni.