RUNMAWI APP-ah Mizo Movie nuai 130 man hralh a ni tawh!

Mizo movie, TV show leh live event-te pekchhuahna, Runmawi App chuan kum 2021 September thlaa din anih aṭangin Mizo movie aṭanga Rs nuai 130 chuang zet an lakluh tawh thu an sawi. Runmawi app hian hlawhtling taka Mizoram's Got Talent an huaihawt hnuah December 2021 khan an film hmasa ber ni turin, Mastea produce "Master Hranga" chu an tichhuak a ni.

Hemi hnuah mizo movie hrang hrangte dah chhoh zel a ni. Film siamtute'n hah taka an film siamah hlawkna tam zawk an chan theih nan Runmawi App hian share tam thei ang ber an pe a, film siamtute piah lamah a changtute ṭhahnem zawkin an lo hlawkpui tawh a ni.

Runmawi App hmangtu (users) hi 1,50,000 chuang an awm mek a, film 36 en tur a awm tawh a ni. Kum 2021 December aṭanga 2022 December thleng khan cheng nuai 130 man vel hralh a ni tawh. Cheng nuai 100 chuang chu film siamtute leh a changtute hian an hlawh chhuak ve tawh niin an sawi.

App aṭanga film-te hi mobile (android leh ios), computer (chrome browser) leh smart tv(screencast,hdmi) hmangtein a en theih a, android Smart TV kaltlangin Playstore-ah app dah tumin hmalakna kalpui mek a nih thu an sawi bawk.

Runmawi App hian film an chhuahsak piah lamah, heng film "Ka U Liana", "Boss Amanda" leh February 11-a tlangzarh tur "Amawii" te hi an produced/co-produced sak a ni.

Film siam hi thil namai lo a nih thu sawiin, "Film siam hi a hautak ve hle a, sum leh pai mai bakah, hun leh tha tam tak sen a ngai ṭhin a, thla 3-4 lai te chawl mang loin rim takin an thawk ṭhin tih kan hriatpui a ṭha hle. Mipuiten keimahni tualchhuak film te kan ngaihhlut thiam hian hah taka film siamtute leh changtute tan malsawmna a lo ni ta ṭhin a, Mizo film industry pawh a lo ṭhang zel anga, film hmuhnawm zawk kan hmuh theih phah zel dawn a ni," tiin film siam hi a hlawk vek loh thu leh, siam tumte tan an inkau reng thu an sawi.