Avatar-i'n kar 7 chhung ro a rel ta! Khawthlang ramah SRK "Pathaan" a duai lo

James Cameron-a kutchhuak, science fiction turu ber tiha mi tam takin an sawi, Avatar (2009) chhunzawmna, "Avatar: The Way of Water" chuan sulhnu duhawm tak a hnutchhiah mek a, kar liam ta North America box office-ah USD mtd 15.7 lakluh belhin kar sarih chhung zet chu a zawnin pakhatna a ni ta.

Avatar 2 hian US bikah USD mtd 623.3 lalut tawhin, US/Canada huamchhunga film sum lakluh tam lamah 10-na a ni mek. Khawvel huapah USD tluklehdingawn 2.117 lalut bawkin, sum lakluh tam lamah 4-na dinhmun a rawn luah tawh a ni. Avatar 2 hian "Avatar" (USD tld 2.9), "Avengers: Endgame" (USD tld 2.799) leh, Cameron kutchhuak vêk "Titanic" (USD tld 2.19)-te chauh a pha tawh lo. Cameron hian mellung pawimawh bik phunin, heng film pali zinga pathumte hi ama direct vek an ni.

Box office thawm a reh

Box office-ah hian film liantham tlangzarh a awm loh avangin sum chevel pawh a tam hran lo hle. "Puss in Boots" chuan kar hmasa lama a dinhmun ngai rawn luah lehin, pahnihnaah a la inhamtang. Hollywood mi hrâng, Tom Hanks-a channa "A Man Called Otto" chu pangana aṭangin pathumnaah a rawn inhlangkai bawk a ni.

Khawthlang ramah "Pathaan" a duai lo

Kumin Bollywood film chhuak tawh zinga ngaihven hlawh ber, Bollywood legend Shah Rukh Khan bakah Deepika Padukone leh John Abraham-te channa, "Pathaan" chu India mai bakah khawthlang ramah pawh a tla na hle. Yash Raj Indian spy pic hian kar liam ta khan USD mtd 5.9 vel a lalut niin an tarlang. Pathaan hi tlangzarh a nih aṭanga ni nga hnuah USD mtd 72 (Rs vbc 572) a lalut leh der tawh a, Hindi film zinga sum lalut tam ber pasarihnaah a ni mek bawk a ni.