Michael Jackson biopic-ah a u fapa Jaafar Jackson

Michael Jackson biopic-a "King of Pop" lem chang turin an chhungkaw mi, MJ-a u fapa, Jaafar Jackson chu thlan a nih thu khawthlang media-te chuan an tarlang. MJ-a hringnun chanchin tarlanna hi "Michael" tih niin entertainment company lian Lionsgate chuan an tichhuak dawn a, Antoine Fuqua-a'n a direct dawn.

Fuqua chuan hemi chungchang hi IG kaltlanga rawn nemnghetin, kum 26 mi Jaafar-a'n a patea lam dan a zirlai chu a rawn pholang. Michael-a u, Jermaine Jackson-a fapa hian "Billie Jean" hunlaia a thuam inbel ang kha a rawn ha a ni. Jaafar hi kum 12 mi a nih aṭangin zai leh lamah a tui tawh hle a, hla ṭhahnem tak cover tawhin ama hlaphuah eng emaw zat a sa tawh bawk a ni.

Oscar nominee vawi thum lo ni tawh, John Logan chuan "Michael" tih script hi a ziak a, rimawi khawvela a sulhnu ropui tak avanga "King of Pop" tih hminglem an pek hial chanchin chu ngaihnawm taka a rawn phochhuah ngei pawh a beiseiawm hle.