Hollywood Walk of Fame-ah The Jonas Brothers; May 5-ah album thar tichhuak zui dawn

Kum 2007 chho vela tleirawl lama tla na tak, Kevin Jonas, Joe Jonas leh Nick Jonas-te unau "The Jonas Brothers" chu January 30 khan Hollywood, California kawtthlerah khawvel huap milarte hming nemnghehna hmun "Hollywood Walk of Fame"-ah lakluh an ni ta a, an fate leh an kawppui ṭheuhte'n an telpui a, hemi rual hian kumin May 5-ah album thar an tihchhuah tur thu an puang zui bawk.

Kum 2005-a din, American pop rock band hian album panga an lo tichhuak tawh a, an album thar tur "The Album" hi an studio album parukna a ni ang.

Disney Channel original movie Camp Rock(2008) leh a Sequel(2010), Camp Rock 2: The Final Jam-ahte an lo inlan tawh a, anmahni pualin Disney Channel series Jonas chu a vawi khatna atan an tichhuak a, season 2-ah erawh Jonas L.A. tihin a hming an thlak a ni.

Jonas Brothers hian album thar an tihchhuah hnuah, tour an neih chhunzawm nghal dawn tih an sawi.

Album-a hla awm tur chungchang sawiin Nick chuan, "Rimawi lama kan mi ngainatte sulhnu kan entawn deuh a; Doobie Brothers leh Bee Gees leh khang hunlaia zaithiam larte zulzuia kan sak an ni. Hla ngaihthlak nuam tak a ni dawn a, live-a play hun kan nghakhlel tawh hle a ni," a ti.