Kids' Choice Awards-ah Taylor Swift, Harry Styles leh Lizzo an langsar

Nickelodeon networks viewers te'n television, film, music leh sports lamah kum liam taa mi hmingṭha leh chawimawi phute vote hmanga an thlanna; kumtina huaihawt ṭhin, Nickelodeon's Kids' Choice Awards 2023 dawng thei turte hming puanchhuah niin, artist huangah Taylor Swift, Harry Styles leh Lizzo-te chu an chungnung fal hle.

"Anti-Hero" hitmaker hi category pangaah a hming a lang a, Harry chuan nods pali neiin Lizzo pawh nods pathumah a hming a lang a ni. Nods pathum hmu zingah Beyonce Knowles pawh a lang.

Adele, Billie Eilish, Lady GaGa leh Rihanna-te'n chawimawina ngaihhlut Favorite Female Artist an inchuh dawn a, Justin Bieber, Post Malone, The Weeknd leh Ed Sheeran-te'n Favorite Male Artist-an inchuh thung ang.

Favorite Music group lamah 5 Seconds of Summer, Black Eyed Peas, BTS (Bangtan Boys), Imagine Dragons, OneRepublic leh BLACKPINK te an inel dawn a, Favorite Global Music Star dawng thei turin Blackpink hming pawh a lang a ni.

Zaithiam rawn lar thar Dove Cameron, Nicky Youre, Lauren Spencer Smith leh GAYLE te'n Favorite Breakout Artist an inchuh thung ang.

Television category-ah "Stranger Things" chuan nomination paruk hmuin hma an hruai a, "That Girl Lay Lay", "High School Musical: The Musical: The Series" leh "The Fairly OddParents: Fairly Odder" te'n nods pali ṭheuh an hmu bawk a ni.

Film category an hrawl

Ngaihven hlawh Film category-ah, "Avatar: The Way of Water", "Black Adam", "Black Panther: Wakanda Forever", "Hocus Pocus 2", "Jurassic World Dominion", "Monster High The Movie", "Sonic the Hedgehog 2" leh "Top Gun: Maverick" te chuan Favorite Movie chawimawina hi an inchuh ang.

Nickelodeon's Kids' Choice Awards 2023 hi March 4-ah sem a ni dawn a, TikTok star Charli D'Amelio leh Nate Burleson te chuan an co-host dawn a ni.