SRK-a 'Pathaan' a che 'hit' zel

Kum li zet Bollywood khawvela kan hmuh loh hnua a lo kir lehnaah Shah Rukh Khan a che ropui zel - Deepika Padukone leh John Abraham te nena an channa Pathaan chu Hindi movie zinga vaibelchhe 300 lalut rang ber a ni!

January 31 khan Pathaan hian India ram chhung bikah vaibelchhe 315 an lalut tling chiah a, tlangzarh a nih aṭanga ni sarih chhung lekin vaibelchhe 300 a lalut tling der - ni 10 chhunga vaibelchhe 300 laluta record lo siam tawhtu, Baahubali 2 (Hindi version) chu a khûm.

Indian film critic leh trade analyst Taran Adarsh-a'n a tarlan dan chuan, K.G.F: Chapter 2 kha ni 11 chhungin '300-crore club' (vaibelchhe 300 lalut chin) ah a tel a, Amir Khan-a channa Dangal khan ni 13 mamawhin, Ranbir Kapoor channa Sanju leh Salman Khan channa "Tiger Zinda Hai" te khan ni 16 an mamawh thung.

Aamir Khan-a channa 'hit' tak PK meuh pawh khan ni 17 a mamawh a, tuna Pathaan director tho Siddharth Anand-a film, Hrithik Roshan leh Tiger Shroff channa "War" khan ni 19 a mamawh. Salman Khan-a channa "Bajrangi Bhaijaan" chuan ni 20 mamawhin, a channa tho Sultan khan 300-crore club lut turin ni 35 a mamawh thung.

Pathaan hian khawvel huap ang chuan, ni ruk chhung lekin vaibelchhe 591 a lalut thei a, ni khata vaibelchhe 100 zel lalut ang deuhthaw a ni phak - a turu rem rem hle.

Kum 57 mi ni tawh mah se 'King Khan' hming lem an pek Shah Rukh Khan hi Bollywood-ah na na na chuan a la te lo hle tih a lang chiang a, kuminah hian a channa dang, "Jawan" leh "Dunki" tih chu tlangzarh leh tura ruahmanna siam a ni bawk.