Priyanka-i'n a vawi khatnan khawvel hmuhah an naute pholang

Bollywood actress Priyanka Chopra Jonas leh a pasal Nick Jonas-te chuan an fanu, Malti Marie chu khawvel hmuhah an pholang ta. Priyanka hian a pasalte band, Jonas Brothers chu Hollywood Walk of Fame-a an lakluh ṭum khan an fanu hi rawn hruai ve in, khawvel media ngaihven a hlawh chho nghal hle.

Nick hian a thusawinaah a nupui chu fakin, "Ka nupui duhtak, ka buailai ber pawha min tudaitu, harsatna ka tawhlaia ka tlukluhna i ni. Nupa kan ni thei hi ka lawm a, thilpek hlu ber a ni. Nang nena fa kan nei hi ka lawm hle." tiin, ""Malti Marie, kum 15 hnuah he lai hmunah ngei hian i ṭhiante hmaah ka tizak chak tawh hle che a ni," tiin a fanu seilen hun a nghahhlelh thu a sawi.

Priyanka Chopra leh Nick Jonas-te hian nikum khan an fanu Malti Marie hi surrogacy kaltlangin an nei a ni. Mipui hmuhah an fanu hmel hi hun rei tak an thup hnuah tunah chuan khawvel hmuhah an rawn phochhuak ve ta a ni.