Elton John-a'n record thar a siam Tour aṭangin USD mtd 800 chuang zet lalut!

British singer, pianist leh composer hlawhtling berte zinga mi, Sir Elton John rimawi zinkawnga a tour hnuhnung ber chuan concert aṭanga sum lakluh tam lamah record thar siamin, USD maktaduai 817 zet a lalut!

"Candle in the Wind" hitmaker hian September 2018 aṭangin "Farewell Yellow Brick Road" hi a nei ṭan a, tour hi a hmawr bawk la ni chiah lo mah se, Billboard Boxscore chuan show 278 aṭangin USD mtd 817.9 lalut tawh angin a chhutsak a, hei hi tour aṭanga sum lalut tam ber leh, USD mtd 800 chuang lalut thei hmasa ber niin a tarlang.

Ed Sheeran chuan kum 2019 khan, "Divide" tour-a show 258 aṭangin USD mtd 776.4 a lalut a, Ed hian U2-i'n "The 360 Tour" aṭanga USD mtd 736.4 an lakluh chu a khum a ni.

Ed leh U2-te hian khawmualpui paruk leh pangaah stadium show an nei a, Elton erawh chuan kum 2018-20 inkar khan North America, Europe leh Oceania-ahte a neih hnuah, final leg chu khawmualpui tinah a nei leh bawk a ni.

"Rocketman" singer hian North American leg hmasa pathuma show 116 aṭangin USD mtd 268.2 a lalut a, nikum July-November inkarah USD mtd 222.1 vel a lalut leh bawk a ni. Hetiang ang bawk hian, European stadium gigs leh arean show aṭangin USd mtd 119.1 a lalut bawk.