Ozzy a tour tawh dawn lo

Ozzy Osbourne chuan tour a neih tawh loh tur thu nimin khan a puang. Kum 74 mi Ozzy hi kum li liam ta khan Parkinson disease a nei tih hmuhchhuah a ni a, hrisel lohnain a tlak buak ve bawk.

Ozzy hi a zâng ruh (spinal) zai vangin a inenkawl mek a, tour a neih tawh loh tur thu a puan avangin May thlaa neih tur European tour bakah ruahmanna dang ṭhahnem takte ṭhulh vek a ni dawn.

Heavy metal band Black Sabbath aṭanga hriat lar Ozzy chuan, "Hetiang hian ka hun tawp hi ka hmang ang tih ka ngaihtuah pha lo. Min ngaisangtute hriatthiam ka ngen tak meuh meuh a ni. In hriat ṭheuh angin kum li liam ta khan tawhsual ka tawk a, ka zâng ruh (spinal) ah hliam na tak ka tuar a ni," tiin a sawi.

Ozzy-a tour neih hnuhnun ber chu December 2018 daih tawh kha a ni a, Inglewood-a neih Ozzfest-ah a zai a ni.