Beardo NE Mega Mister 2023 Pakhatna C Lalpekhlua lawmpuina hun hmang

Beardo Mega Mister Northeast 2023 neih zawh taka pakhatna, C. Lalpekhlua chu nimin khan Aizawl Press Club-ah lawmpuina hun hman a ni. Hemi rual hian Sunsilk Mega Miss NE aiawha Mizoram aiawh, Isha Vanlalhriatrengi leh Zorinsangi-te pawh lawmpuina hlan.

Mega Mister NE hi vawi 12 an thlanna a ni. Mizo tlangval C.Lalpekhlua hi Mizoram aṭanga NE Mega Mister atana thlan hmasa ber a ni. C.Lalpekhlua hi C.Remtluanga leh Pi Lahlimpuii te tupa niin, Aizawl Venghnuaiah an cheng mek a, P.U.C-ah Education 6th semester zirlai a ni.

Sunsilk Mega Miss NE erawh vawi 19 lai neih tawh niin kumin atan hian kan mizo nula pahnih, Isha Vanlalhriatrengi Tuivamit, Aizawl leh Zorinsangi, Chhinga Veng chu Finalist zingah an tel pha.

N.E Mega Mr/Miss/ International (India) hi mega Entertainment kaltlanga neih ṭhin a ni. Kumin hian Mega Mister NE bik hi Beardo Company senso a buatsaih a ni. Sunsilk Mega Miss a Top 3 thlan chhuah te Crown hi Caratlane Company-i'n a sponsor bawk.

He contest neihnaah hian Mizoram aṭangin a vawi khatna atan Ms Partei Colney chu endiktu atan ruat a ni.

NE Mega Mister C Lalpekhlua chuan, thil engpawh tih dawnin mahni inrintawkna neih a pawimawh thu a sawi. C Lalpekhlua chuan, talent neisaa piang tumah an awm loh thu sawiin, "Thawhrimna nen talent hi chher theih a ni. Thil engpawh ti dawn ila mahni inrintawkna leh teirei peihna neih a pawimawh," a ti.

Tuna a hlawhtlinna chu Pathian malsawmna leh Mizoram mipui thlawpna a neih ṭhat vang a nih thu te, college 3rd semester zirlai a nih thu leh college mister-ah thlan a nih thu te, NE Mega Mister contest chu official mister contest a tel vawi khatna a nih thu te leh, amah sponsor tu hrang hrang chungah a lawm thute a sawi bawk.