Adidas brand ambassador thar Jenna Ortega

German multinational corporation, Adidas chuan tun hnaia television series “Wednesday,” aṭanga rawn invawrh, Jenna Ortega chu an brand ambassador thar atan an puang a, an label thar tlangzarh turah pawh Jenna hi an company hmai lanna ber tur a nih thu a sawi. Adidas chuan kum 50 hnuah label thar Adidas Sportswear chu an tlangzarh hnai a, Performance leh Originals labels nen nihna hran ṭheuh an kengtel tawh dawn a ni.

Ortega chuan, "Adidas ka ngainatna hi hun rei tak a ni tawh," tiin, "Sport, music leh culture lamah nghawng thui tak a nei tawh a, kawng tam takah sulsutu a ni chho mek zel a ni. Kan tleirawl lai aṭang tawha Adidas sneakers leh T-shirt nitin deuhthawa lo inthuam ṭhin ka ni. Tun thleng hian ka wardrobe-a thawmhnawte hi three stripes an la ni. Adidas chhungkaw mi ka ni thei hi ka lawm hle a, an label hmel lanna ka ni tur hi ka lawm takzet a ni," tiin a sawi.

Nikum November khan, Adidas chuan an company chief executive thar atan Puma CEO hlui, Bjørn Gulden an lak thu an puang. Gulden kaihhruaina hnuaiah Kanye West nena an thawhdunna an titawp tawh bawk. Adidas-Yeezy agreement tihtawp hnuah Gulden hian company hi a enkawl chho dawn a ni.

Hetihlai vek hian Ortega pawhin, Addams Family behchhana TV series hit tak “Wednesday,” vangin kum 2022 chu ropui takin a khar a, a series channa hi a hlawhtling hle. Netflix-a English-language series enhlawh ber dawttu niin, khawvel huapah chhungkaw mtd 150 chuangin an stream tawh a ni.