Samsung Galaxy S23, Galaxy S23+, Galaxy S23 Ultra an tlangzarh ta!; February 17 aṭangin a lei theih dawn

Samsung chuan an flagship series lineup, Samsung Galaxy S23, Galaxy S23+, Galaxy S23 Ultra-te chu Nilai ni khan official takin an tlangzarh ta a, a man tlawm ber S23 (8GB+256GB) hi Rs 74,999 aṭanga inṭanin, an top model S23 Ultra (12GB + 1TB variant) hi Rs 1,54,999 man a ni a, a model leh storage a zirin a man hi a danglam hret hret a ni.

Galaxy S23 series ho hian processor changkang ber, Snapdragon 8 Gen 2 leh, display ṭha mi Dynamic AMOLED 2X display an hmang vek dawn a, smartphone zingah Gorilla Glass Victus 2 protection hmang hmasa ber a ni. An model sang ber S23 Ultra hian quad rear camera setup neiin, a camera hi 200-megapixel zet a ni a, camera chhia a ni hauh lo ang le. Galaxy S23 leh Galaxy S23+ erawhin triple rear camera module set-up neiin, a main sensor-ah 50-megapixel an hmang thung a, hei pawh hi hman tlak tak tura ngaih a ni.

Galaxy S23 series hi nimin aṭang khan pre-booking a tih ṭan theih tawh a, February 17 aṭangin zawrh chhuah a ni ang. Samsung chuan an flagship phone thar hi India rama siamchhuah vek a nih tur thu sawiin, India rama hralh tur Galaxy S23 smartphones-te hi Noida-a an company factory-ah ngei an siam a, tualchhunga mamawh ang te hi chu Noida factory-a siamte'n an phuhru zo leh vek dawn a ni, tiin Samsung chuan thuchhuah an siam.