Leitlang Pictures film MIMI kar lehah tlangzarh a ni dawn ta

Leitlang Pictures film thar ber tur Mimi (Lersia play original mini series) chu karleh, February 10 hian tlangzarh a ni dawn ta.

Mizo film industry lama tawnhriat ngah leh, director kan neih zinga a ṭha ber pawl tiha chhal ngam Mapuia Chongthu kutchhuak kan hmu leh dawn a, hei ringawt pawh hi en ti chakawm zualtu a tling nghal der tawh a ni. Film pumpui hi Kolasib leh a chhehvela shoot zawh vek niin, mini series a nih angin a budget pawh hi Mizo film ah chuan a namai lo hle a, a project pumpui atan hian Rs nuai 12 bawr vel hmanral nia chut a ni.

Project chungchang

He project a chang tur hi audition hmun hnih - Aizawl leh Kolasib-ah neih a ni. Chuta ṭang chuan actor/actress turte thlan chhuah leh niin, Nunna thar leh Lungdumtu a kan lo hmuh tawh Andrew Laltlankima, H.Lalhmangaiha, Laltanpuii(Nu Tpi), Hruaia Sailo leh, Nu Machhungi(Scooty) te, film lama experience lo nei ṭha tak tak bakah hmel thar eng emaw zat kan hmuh belh leh dawn a ni.

He film-a a chang/inlan zawng zawng hi mi 50 bawr vel an ni a, hei mai bakah hian mipui scene leh office staff leh scene ṭhenkhata lang turin KṬP Diakkawn leh Vengthar YMA Kolasib te rawih ṭhin an ni bawk.

"Scene a zir zelin rihna tihdanglam a ngai"

Project Mimi hi Kolasib leh a chhehvel a shoot a nih angin, cast leh crew pumpuite hian in luahin thla khat leh chanve vel shooting ngawrh takin an nei. He film a Mimi role hi Vanlallawmawmi Aizawl, Bawngkawn in a chang. Vanlallawmawmi hian a film character mil zelin weight loss/gain a ngai a, a chang leh school naupang thau chhum deuh anga a lan a ngai a, a lo puitling chho a hna te an thawk chho a, chutah tak chuan nula pian nalh 'slim' deuh zaiha lan ngaih hunte a awm leh bawk. Chutiang chiah chuan Andrew Laltlankima leh H.Lalhmangaiha te pawh hian an character a zir zelin an inti cher ve bawk a ni.

Series rei zawng

Mimi hi Mini Series tura duan niin a film pumpui pui rei zawng hi darkar 3 vel a ni a, hei hi episode 5 a ṭhen leh a ni. Tunah hian post production/editing tih fel thawkhat a ni tawh a, editing bik hi December thla tirte aṭang khan an bei chho char char a ni.

Khawiah nge a en theih ang..

Lersia Play App ah Febuary 10 aṭangin mipui en theih tura chhawpchhuah a ni dawn. Mimi(Lersia Play Original Mini Series) hi karleh Zirtawpni Feb 10, 2023 hian Saikuti Hall, Lunglei-ah ticket tlem azawng leh sawm bikte nen release-na hun hi hman a ni ang.