Kiara Advani leh Sidharth Malhotra an innei dawn

Bollywood couple Sidharth Malhotra leh Kiara Advani-te chu tunlai India media-te chaw tui ber an ni chho mek. A awm lo hran lo; karleh February 6 hian sawmbik mi 100 bawr vel hmaah an innei dawn tlat alawm.

Shershaah co-star-te hian February 4 leh 5-ah ‘the gateway to the Thar Desert’ an tih Suryagarh Palace, Rajasthan-ah wedding ceremony hmahruai an neih hnuah, Februay 6 hian a inneihna hun pui ber hman a ni ang. Kum 2021 khan Bollywood star pahnih, Katrina Kaif leh Vicky Kaushal-te chu helai hmunah tho hian an lo inkutsuih tawh bawk a ni.

Bollywood hmangaihna kawng langsar lo

Sidharth leh Kiara-te hian an inngaihzawn thu hi vantlang hriatah an tilang ngai lem lo a, han dawp tum viau ṭhin mah se an thup mawi thiam thei hle.

Kargil War-a Indian Army Officer; a ram tana a nun hlantu, Vikram Batra hringnun behchhana an siam "Shershaah" film an chan dun aṭanga sawizawm ni mah se, hemi hma pawh hian an lo inzui fe tawh niin an sawi.

Kum 2018-a tihchhuah, Kiara channa "Lust Stories" aṭang khan an lo inhmelhriat ṭan tawh. Kiara chuan Koffee With Karan Season 7-ah an intawn dan chungchang sawiin, "Lust Stories wrap up party aṭangin kan inhmelhriat ṭan a, chumi hnuah pawh kan inhmu fo bawk. Kha zan kha ka theihnghilh tawh ngai lo," tiin ṭhianṭha piah lam daih an nih thu a lo sawi tawh a ni.

An pahniha film an chandunna hmasa ber "Shershaah" aṭang phei kha chuan inhmeh titu an tamin film hit tak a ni zui ta a ni. Social media lamah reels 'romantic' tak tak leh an pahniha an thlalak dunnate an pholan fo tak avangin fans tam tak chuan an rinhlelhna chu thudikah an pawm chho ṭan tawh a, vantlang hmaah pawh an inhuat loh hmel tak taka hmuh an ni fo ṭhin. January 2021 khan, Maldives-ah New Year's vacation an hmang dun a, an let hnuah Kiara chuan Mumbai-ah Sidharth-a nu leh pa a hmu bawk niin an tarlang. Hemi rual hian an pahniha an piancham ve ve chu an hmandun bakah, Shershaah film kum khat tlinna lawmna pualin hun an hmang bawk a ni.

Tunah chuan a chiang ta..

August 2022 khan Kiara leh Sidharth-te hi a hran ve vein Koffee With Karan Season 7-ah an inlan a, show host-tu Karan pawhin an inngaihzawnna chungchang hi dawpchhuah a tum viau. Kiara nen an wedding plan chungchang a zawhnaah Sidharth chuan Kiara nen hmabak eng tak a suangtuah ṭhin thu a sawi. Tunah chuan Bollywood chuan nupa tuak thar duhawm tak a neih belh leh dawn ta a ni.