AMAWII OST pahnihna 'Kan dam nan' tlangzarh

Zote Entertainment project 'Amawii' Film Original Soundtrack hmasa zawk, Mizo Idol Season 7-a pakhatna Hmangaihi'n mawi taka a sak ' I awm tlat si' an tih chhuah hnuin, film OST pahnihna 'Kan dam nan' tih hla Grace Pachuau sak chu tih chhuah a ni ve leh ta.

He hla hi Grace Pachuau phuah niin, hla 'cool' leh nalh tak, mi thinlung hneh thei tak tur lam hla a ni. AMAWII film director Mike-a chuan, "Kan Ost pakhat ang bawk khan he hla hi ka beisei a sangin, Grace-i hi mithar ni mah se, mithar anga teh leh en chi a nih a ni lo a ni," tiin, Grace-i hi tleirawl talent ṭha tak nei a nih thu a sawi.

Music Producer Rpa Ralte pawhin he hla mawi a tih thu leh Grace-i ah a beisei a san thu a sawi. AMAWII Original Soundtrack pahnihte hi a kut chhuak ve ve an ni.

OST hmasa nen a genre a inang lo ang bawkin, a music video kalhmang pawh a inang lo hle a, "Kan dam nan" tih hla ah hian Grace Pachuau hi a film a inlan angin, film an shoot na hmun ngeiah an chhungkaw zinga tel anga shoot a ni a, a film ah chang ve emaw mai tur khawpin he music video-ah hian an lantir a ni.