Vawiinah Bollywood nupa tuak thar kan nei dawn!

Hun rei tak aṭanga thawm a awm hnuah, Kiara Advani leh Sidharth Malhotra-te chu vawiin hian Rajasthan-a Jaisalmer, Suryagarh Palace-ah an innei dawn a, inneihna hmang turin milar rual ṭhahnem takin an inneihna hmun hi an thleng khawm tawh.

Kum 2023-a Bollywood couple inneihna hmasa ber tur a ni ang. Kiara Advani nuṭapa Mishaal Advani chuan a farnu pualin sangeet ceremony-ah hla special tak a sa dawn a, Mishaal hi rapper, composer leh music director a ni.

Nimin lamah khan, filmmaker Karan Johar leh actor, Shahid Kapoor leh a nupui Mira Rajput-te pawh Mumbai-a private airport-ah hmuh an ni. Karan Johar hian project eng emaw zatah vawiin lama nupa tuak thar ni mai turte hi a lo thawhpui tawh a, a talkshow-ah pawh an pahnih hian a hran ve vea a lo kawm tawh bakah, an inngaihzawn thu hi vantlang hriatah puanchhuah tir tumin a fiam fo ṭhin.

Sidharth Malhotra leh Kiara Advani-te hi an pahniha an film project hmasa ber, "Shershaah" aṭanga inngaizawng ṭan angin an sawi a, hemi hnu hian holiday vawi duai lo an hmang dun zui bawk. Kum 2021 khan an pahnih hian Maldives-ah hun an hmang dun a, kum 2023 khuhhawnna Dubai-ah hun an hmang dun bawk a, hetah hian designer Manish Malhotra leh Karan Johar-te pawhin an telpui a ni.