Khiangte Construction Ṭhazual Gospel; Zoremtluanga "Agape Hmangaihna" in chart chung ber a luah

Khiangte Construction Ṭhazual Gospel chart-ah Zoremtluanga Khiangte in thla hmasa, January 19 maia a tihchhuah "Agape Hmangaihna" chu chart hmasaah pariatna dinhmun a hauh hnuah chart chung berah a rawn inhlangkai ta.

"Agape Hmangaihna" hla chungchang

Pathian fak hla mawi, tluangtlam leh ngaihthlak nuam tak hi Lalawmpuia Sailo phuah niin, he hla hi mihringte inhmangaih tawnna aia Pathian hmangaihna, Isua hmangaihna ropuizia leh, chungnunzia fiah taka lantirna hla a ni. Mihring hmangaihna chu chuai leh mai ṭhin, tawp chin nei a ni a, mihringte inhmangaihna chu Pathian min hmangaihna ropuizia kan hriat fiah thiam theihna tur hmanrua ang chauh zawk a ni, tiin hla chungchang an sawi.

He hla hi rimawi lama sulhnu nei ṭha Lal K Sailo-a'n music siamsakin, Recording hi Masky Records-ah tih a ni a, video hi Chiangtea Videography kutchhuak a ni.

Lal K Sailo leh Arini

Artist eng emaw zat music mawi tak tak lo siam sak a, sulhnu ṭhahnem tak hnutchhiah tawhtu Lal K Sailo chuan ama hlaphuah "Kulhbing sang" hmangin chart lamah san lam a la pan zel a, pahnihnaah a rawn inhlangkai.

R. Lalrinmawii (Arini) hla thar ber "Sual hnehna" chuan hmasawn lam pan zelin pathumnaah a rawn inhlangkai tawh bawk . He hla hi Francesca Battistelli "Giants Fall" tih hla aṭanga lehlin niin, a letlingtu hi Amtea a ni.

Tute nge lo lang?

Chart lama hming chher mek, Dinai C. Lalruatdiki "Ka lo hre ta"tih hla chuan tlakhniam lam a la pan thei lo a, palinaah a awm. C. Zothanmawii "Ka damna" chuan a dinhmun ngai rawn luahin top 5 huangah a la inhamtang bawk a ni. Mama Khiangte, Lalnuntluangi (Nupuii), Lalthansangi, Becki Fanai leh, Tuikual North Br. KṬP Band-te chu chart luahlumtute an ni.