Grammy Awards vawi 65-na Beyonce-i'n record thar a siam; Award 32 zet a dawng ta! British artist-te tan zan chhinchhiahtlak

Khawvel huap rimawi chawimawina ngaihhlut, Grammy Award vawi 65-na chu February 5 khan Crypto.com Arena, Los Angeles-ah sem a ni. Beyonce chuan record thar rawn siamin, rimawi huanga a hun hman chhungin Grammy Awards vawi 32 zet a dawng tawh a, hetih laiin kum 2022 ṭha taka thlahliamtu Harry Styles chuan chawimawina ngaihhlut ber tiha chhal ngam, Album of the Year a hum haw thung.

Grammys 2023 nomination list hi November 15, 2022 khan puanchhuah a ni tawh a, October 1, 2021 aṭanga September 30, 2022 inkara artist che ṭhate chu he award dawng thei tur hian chhawpchhuah an ni. 63rd leh 64th Grammy ceremony host, Trevor Noah chuan a vawi thumna atan kumin hian a kaihruai leh a ni.

"Queen Bey" nge nge

Kumina nomination pakua lai hmua hmahruaitu, Beyonce chuan a album 'euphoric dance opus,' Renaissance chu best dance/electronic album a lak pui avangin kum 20 chuang chhung zet award 31 neia Grammys dawng hnem ber record chelhtu, Hungarian-British conductor George Solti record a khum. Beyonce hian tunah chuan award 32 zet chu a trophy cabinet-ah hian a hung vang tawh a ni.

Nimin zing bikah "Queen Bey" hian award pali a dawng a, mahse Los Angeles traffic tawt tak avangin a award ṭhenkhat hi ceremony laiin a dawng hman lo thung!

"Harry's House" rûn a mawi

Award ngaihhlut Album of the year chu Harry Styles kutah hlan a ni a, a album hit em em tak mai, "Harry's House" vang a ni. Styles rimawi tluangtlam leh thothang danglam tak hi Grammy voters-te lakah a tla na hle. British star chuan a chawimawina dawn chu award dangte lakah a chungnun bik loh zia sawiin, "Heng ang zanahte hi chuan, music huangah a ṭha ber an awm thei lo tih kan hriat reng a pawimawh hle a ni," tiin he category-a ṭum li zet lo vanduai tawh Beyonce hnemna'n ni ngeiin thu a sawi. Kum 2015-a Adele-i'n a album '25' a dawn ṭum pawh khan phu loh a intihthu sawiin, Beyonce chu dawn phu zawk a nih thu a lo sawi tawh bawk. Harry chuan, "Tu pawh mai hian he chawimawina dawng turin studio kan luhchilh lo in ka ring. Mahse heng angte hi ka chungah a thleng ve ta mai hi awih thiam pawh a harin ka lawm hle a ni," a ti.

British artist an huangtàu

"Music's biggest night" tiha an sawiah hian British artist-te chuan zan duhawm tak an hmang a, indie duo 'Wet Leg' chuan award pahnih an dawng a, Sam Smith leh Kim Petras hla hit 'Unholy' chuan best pop duo/group performance an dawng bawk a ni.

Sam Smith chuan kum 2015 khan best new artist bakah category pathum dangah award a hui a, kum sarih zet kutbenga a awm hnuah kuminah erawh award an dawng ve leh ta a, BDSM-inspired performance ngaihven hlawh tak an rawn lantir zui bawk a ni.

Rimawi húanga mi bikte an sûn

Music Industry-a sulhnu ropui hnutchhiahtute hriatrengna hun hmannaah Olivia Newton-John, Irene Cara, David Crosby leh Jeff Beck-te sunna hun an hmang a, Kacey Musgraves-i'n "Queen of Country" Loretta Lynn pualin hun a rawn hmang.

Migos rapper Offset chuan nikum November thlaa a vahpa leh a bandmate vanduaithlak taka thi ta, Takeoff puala a hla phuah 'Without You' chu a rawn sa bawk a ni.