SZA lallukhum laksaktu TXT (TOMORROW X TOGETHER); Hot 100-ah Miley a chungnung chhunzawm zel

Billboard 200 lamah lal thar kan nei ta! SZA album hit tak "SOS" in kar sarih chhung zet a zawna ro a rel hnuah South Korean boy band, TXT (TOMORROW X TOGETHER) debut album "The Name Chapter: TEMPTATION" chuan 200 album chart chung ber an rawn luah ve leh ta.

TXT hian kar liam ta chhung khan equivalent unit 1,61,500 chuang hralh chhuah belhin, nikum khan "Minisode 2: Thursday's Child" (No. 4) leh kum 2021-ah "The Chaos Chapter: Freeze" (No. 5) hmangin top 10 hi a rawn thleng tawh a, kuminah erawh dan zawh rual lohin an rawn kal fawr ta a, pakhatna dinhmun lai an rawn chuangkai thei tawh a ni.

Big Hit Music hnuaia din, TXT-ah hian member panga Yeonjun, Soobin, Beomgyu, Taehyun leh HueningKai-te awmin, kum 2019 aṭang khan rimawi khawvel hi an rawn luhchilh ṭan. Tunah chuan khawvela chart ngaihven hlawh bera roreltu an ni tawh a ni.

Kar sarih chhung zet pakhatna a nih hnuah SZA "SOS" chuan a lallukhum chu midang hnenah a ken ve a ngai ta a, equivalent unit nuai 1 chuang zet a la hralh chhuak pha tho a ni. Hetihlai hian, Taylor Swift "Midnights" pawh pahnihna aṭangin pathumnaah tla thla bawkin, unit 68,000 chuang chu a la nei phak tho.

Hot 100-ah Miley bawk!

Miley Cyrus studio album pariatna, March 10-a tlangzarh tur "Endless Summer Vacation"-a a lead single 'Flowers' chuan a kar thumna atan pakhatna a hauh leh ta a, kum 2013-a ama record lo siam vek "Wrecking Ball" record chu a nihrual bawk.

Billboard tehfung pawimawh Streaming Songs leh Digital Song Sales chart-ah pakhatna dinhmun hi a hauh fai vek a, hei bakah hian tlangzarh kara Spotify-a stream nei hnem ber record siam bawkin, stream mtd 101 chuang zet a nei a, khawvel huap chart-ah a hming lan lohna hi a awm mang lo a ni.

SZA "Kill Bill" chuan kar li chhung Hot 100-ah hian pahnihna dinhmun a hauh tawh bawk a, Metro Boomin, The Weeknd leh 21 Savage thawhdunna hla "Creepin" chuan Taylor Swift "Midnights" khumin pathumnaah a inhlangkai bawk a ni.