Kum thum hnua Grammys entu tam ber ṭum a thleng

Thawhṭanni zinga sem zawh tak, Grammys vawi 65-na chu kum thum hnua entu an ṭhathnem leh ber ṭum niin TV ratings thar ber chuan a sawi.

CBS leh Paramount+ tarlan danin, Grammys kha live-a entu mi maktduai 12.4 lai an awm. Kum 2022 khan entu mi mtd 9.59 vel an awm a, kum hmasa nena khaikhinin a punna hi 30% a tling.

Covid-19 hripui len hma January 2020-a Grammys an sem ṭum khan mi mtd 18.69 vel zetin an en bawk a ni.

Paramount+ chuan 2023 Grammys kha live a an pekchhuah tawh azawnga livestreaming audience tam ber ṭum a nih thu sawiin, entu zat tak erawh chiang takin an tarlang lo thung.

Grammys vawi 65-na nomination list chu November 15,2022 khan puan niin, October 1, 2021 - September 30, 2022 inkara rimawi huanga artist che ṭha zualte thlanchhuah an ni.

2023 Grammy Awards kha Trevor Noah chuan a ṭum thumna atan a host a, Harry Styles chuan Harry’s House hmangin album of the year a dawng a, Lizzo “About Damn Time”-i'n record of the year, Bonnie Raitt “Just Like That”-i'n song of the year, leh jazz singer Samara Joy te'n best new artist an hum haw a ni.