Fulbright fellowship a dil theih

The United States-India Educational Foundation (USIEF) chuan nimin khan, kum tina a lo tih ṭhin dan angin Fulbright-Nehru leh Fulbright fellowship dangte dil theih a nih thu an puang. Zirlai, research scholar, zirtirtu leh eizawnna dang neite tan pawh dil theih a ni.

U.S. Department of State leh Ministry of External Affairs, India-in he fellowship hi an sponsor niin, Mizo zingah pawh he fellowship kaltlanga US lama zirna chhunzawm an lo awm nual tawh.

Kum 2017-a Vanglaini buatsaih Mizo Award dawngtu Dr. Joy L.K. Pachuau pawhin 2016-17 khan Fulbright Nehru Academic Excellence Fellowship hi a lo hmu tawh a ni.

Prof J Doungel, Mizoram University chuan kum 2021 khan he fellowship hi a lo hmu tawh a, University of Cincinnati, Ohio-ah a zuk awm tawh bawk.

Prof J Doungel chuan, "Khawvelin a ngaihsan fellowship a ni a, a ṭha takzet. Keipawhin ka hlawkpui hle," tiin Vanglaini a hrilh.

2021 Fulbright-Nehru Postdoctoral Research Chandra Vadhana Radhakrishnan chuan, "Stanford University-a Fulbright Postdoctoral fellow ka nih chiah khan, ka suangtuah phak piahlamah nasa takin min pui a ni," a ti.

University of New Mexico, Albuquerque-a 2021 Fulbright-Nehru Doctoral Research fellow Neeraja Sajan chuan, "Ka research beihna kawnga hma ka sawn theih nan min pui nasa a, international researcher-te nen thlengin hun ṭha min siamsak a ni," tiin a sawi bawk.

Fulbright fellowship chungchanga hriatchian duh nei tan an website www.usief.org.in ah enchian theih a ni a, ip@usief.org.in ah email hmangin hriatchian duh nei tan zawh theih a ni bawk - New Delhi, Chennai, Hyderabad, Kolkata leh Mumbai-a USIEF office-te chu biak pawh theih reng an ni.