Michael Jackson-a Music Catalog man a to dawn hle

Michael Jackson-a estate chuan zaithiam fam ta music catalog chu 50/50-a share insem turin inbiakna an kalpui mek. MJ estate hian Sony nen USD tluklehdingawn khat dawnin inremna an siam dawn niin an tarlang.

Variety tarlan danin, he inremna hi USD mtd 800-900 inkar bawr vel ni turin an dah. Thu chiang tak puanzar la ni lo mah se, Sony leh an financial partner-te hian estate's interest 50% hi MJ-a publishing, recorded-music revenues, "MJ: The Musical" Broadway show leh biopic chhuak mai tur "Michael" bakah, asset eng emaw zat a huam tel tur thu an sawi.

TMZ chuan estate-in MJ-a music leh asset aṭanga a hlawkna pumhlum an chan dawn loh chuan 50/50 share hi an pawm loh tur thu a sawi thung.

Indawrna hi an kaltlangpui thei a nih chuan music catalog market chanchina inremna sang ber a ni dawn a ni. Sony hian Bruce Springsteen-a catalog pumpui chu USD mtd 600 bawr velin an lo leisak tawh a, Justin Bieber chuan tunhnai lawkah USD mtd 200 in Hipgnosis Songs Capital hnenah a lo hralhfel bawk.

Drake leh Nicki Minaj telna, Young Money catalog Lil Wayne enkawl chu Universal Music Group hnenah USD mtd 100 bawr velin hralh a lo ni tawh bawk a ni.

MJ catalog hralh chungchanga thulengvak karah, King of Pop biopic pawh buaipui mek a ni. Lionsgate leh Antoine Fuqua direct-na hnuaiah tlangzarh a ni ang. January thla tawp khan, MJ-a u fapa, Jaafar Jackson chu MJ biopic-ah lead role chang tura tihchian a ni tawh bawk a ni.