Avatar nekthlatu "Knock At The Cabin"

Box office-ah "Avatar: The Way of Water"-i'n kar sarih chhung zet dinhmun sang ber a chan hnuah, a rorelna chu nekthlakin a awm ta a, a nekthlatu hi eng dang ni loin horror film fak hlawh tak "Knock at the Cabin" a ni.

Dave Bautista channa apocalyptic psychological horror film hi "The Sixth Sense", "Unbreakable" leh "Split" lama a sulhnu kan lo hmuh tawh M. Night Shyamalan kutchhuak a ni a, Paul G. Tremblay-a'n kum 2018-a novel a tihchhuah 'The Cabin at the End of the World' behchhana a siam a ni. US bikah kar liam ta khan USD mtd 14.2 vel lalutin, ram dang nen USD mtd 21 chuang a hailut tawh a, film senso zat hi USD mtd 20 chauh a nih avangin an senso chu a khum der tawh. Critics ten an fakin Rotten Tomatoes lamah 68% lai a hmuh avangin film daihrei tur tak niin a ngaih theih.

Film lamah Tom Brady

USD mtd 12.5 laluta pahnihna dinhmun hauhtu hi sports comedy film "80 for Brady" a ni a, tunhnaia a nupui Gisele Bündchen nen an inṭhen vanga chanchin ngah tak, NFL quarterback chawlta Tom Brady chuan a produced bakah, amah pawh a inlan nghe nghe a ni.

James Cameron kutchhuak "Avatar 2" chuan USD mtd 10.8 lalutin pathumnaah a tla thla. Khawvel pumah USD tld 1.6 dawn lalut tawhin, sum lakluh tam lamah "Avatar" (USD tld 2.1) leh, "Avengers: Endgame" (USD tld 1.9)-te chauh a phak tawh lo a ni.

BTS, Pathaan leh a dangte

South Korean pop sensation, BTS (Bangtan Boys) chuan fanbase an neih ṭhat zia rawn lantir nawn lehin an debut film "BTS: Yet to Come in Cinemas" chuan USD mtd 6.3 vel a lalut. BTS-i'n an solo project ṭheuh buaipui tura an inṭhaṭhen hmaa an performance hnuhnung ber, October 2022-a Busan concert film hian hlut a hlawh chho hle a ni. SRK channa "Pathaan" pawhin khawthlang ramah a chetṭhat la chhunzawmin USD mtd 2.7 a lakluh belh bawk.