Mizoramah December 2022 aiin January 2023-ah lirthei hralh a tlem

January 2023 chhungin Mizoramah lirthei chi hrang hrang 2,339 hralh chhuah a ni a, a hma thla aiin a tlem zawk.

Federation of Auto-mobile Dealers Asso-ciations (FADA)-in a tarlan danin thla liam ta chhungin Mizoramah two-wheeler 1,599, three-wheeler 98, commercial vehicle 167 leh personal vehicle 457 hralh chhuah a ni.

FADA-in thuchhuah a siamah, December 2022 chhungin Mizoramah lirthei chi hrang 2,458 hralh a nih laiin, kum thar January-a hralh zat chuan 119-in a pha lo a; a bikin two-wheeler hralh chhuah 193-in a tla hniam.

Hetih lai hian January 2022 khan 2,014 hralh a ni a, thla liam ta nen khaikhinin January 2023-ah 325-in hralh chhuah a tam ve thung a, a punna hi 16.14% a ni.

India ram pumah thla liam ta chhungin lirthei 18,26,669 hralh a ni a, a hma thla December 2022-ah 16,22,317 hralh a nih laiin January 2022-ah 16,08,505 hralh a ni bawk a; ram pumah lirthei hralh chhuah a pung viau tih a lang.

FADA Mizoram Chapter chairman Dr Franklin Lalrinngheta (Mana Motors) chuan January-ah Mizoten sum hman kan harsat ziah ṭhin a, lirtheia sumdawngte a nghawng niin a sawi.

"December hi Mizote kan pawk hun lai leh kan hunpui lian, Krismas leh Kumthar lawmna atana kan insen nasat hun a ni. January-ah India ram pumah lirthei hralh chhuah tam mah se keini Mizoramah chuan lirthei chauh ni loin thil dang hralh chhuah a hniam deuh ṭhin.

"A hma thlaa kan insen nasat ṭhin avangin January-ah hi chuan Mizoten mamawh bak thil lei kan ip viau niin a lang a, kan economy a la sang tawk lo tihte pawh a lantir tel thei awm e," a ti.