Rebecca Fanai hla thar kan hmu leh dawn ta e

'Min Zirtir ang che' tih hla hmangin zaithiam Rebecca Fanai chuan mipui te min awi leh dawn ta. He hla hi hla phuah thiam Chhantea Ralte phuah a ni a, harsatna leh buaina karah pawh kan chunga Pathian rorel dana lungawi zir tura min ṭanpuitu tur a ni, tiin a hla phuah chungchang a sawi.

Rebecca Fanai hian 'Myanmar Lungphang suh aw' tih hla Chhantea Ralte phuah tho hi mawi takin a lo sa tawh bawk a, hei hi Zoram in Rebecca Fanai kan hmelhriat ṭanna pawh a ni a, Burma lama kan unau harsatna tawk mekte tan phei chuan a hlu tak zet a ni.

Rebecca Fanai hi tunah hian USA ah Nurse hna thawkin a awm a, kum liamta 2022 khan zaithiamte tana chawimawina hlu tak tak Chin New Artist of the year-ChinTV, leh New Artist of the year- ChinTube People's Choice Awards a dawng nghe nghe.

'Min zirtir ang che' tih hla hi February ni 12, Sunday zing dar 7:30-ah Rebecca Fanai Youtube channel ah en leh ngaihthlak theih tlangzarh a ni dawn a, February 13, Thawhṭanni ah Zonet lamah tih chhuah a ni ve thung ang.