Zaninah "Amawii" tlangzarh a ni dawn ta!

Zote Entertainment buatsaih, "AMAWII" film chu zanin dar 7:30 hian Vanapa Hall-ah tlangzarhna hun hman a ni dawn ta. Ticket hi Rs 150 man niin, film release hmain lei theih a ni.

Film buatsaihtu, Zote Entertainment hian nikum khan "KA U LIANA" tih film an lo tichhuak tawh a, mipui aṭang pawhin feedback an dawng ṭha hle. Runmawi Special Award 'Best Seller' niin, Lunglei Runmawi Award ah Best Film atana thlan chhuah zingah a tel nghe nghe. "Ka U Liana" film-a director Mike-a'n a direct leh a, Script pawh hi amah vekin a ziah avangin beisei pawh a sangin, a hmuhnawm leh viau tura rin a ni.

AMAWII hi chhung-kaw pahnih inang lo tak, zu vanga buaina an tawh dan te, khawtlang leh thlarau nun thlenga a nghawng nasat theih zia pholanna a ni. Thil thleng tak tak behchhana siam leh buatsaih niin, gospel film ni chiah si lo, gospel film a rin luh a nih theihna lai awm siin a rawn kual dawn a ni.

He Film-ah hian lemchan khawvela kan hmelhriat tawhte leh zaithiam, designer thlengin an rawn inlan pawlh nuk dawn a, 'Ka U Liana' misual lema chang thiam em em mai, Ruthi Chenkual, Mizo Idol star David Darlong, designer lar Tluangpuii Hmar, YouTuber Misualpa MPA te pawh an rawn inlan dawn.

Vanapa Hall-ah tlangzarh a nih aṭanga hun rei loteah Runmawi apps aṭanga en theih tura chhawpchhuah nghal a ni ang.