IASE-in HIV/AIDS dona hun an hmang

Institute of Advanced Studies in Education (IASE) chuan nimin khan MSACS nen ṭangkawpin IASE tualzawlah Winter Fest an nei a, he hun hi HIV/AIDS dona hun atan an hmang.

IASE principal Prof Lallianzuali Fanai chuan, "HIV/AIDS-in min run nasa hle. Nikum September thla aṭanga an record-ah khan kum 25-34 inkar bika positive hi 42% lai an hmu chhuak a, kum 35-49 inkar hi 27.25% a ni pha bawk. Chuvangin zirlaite hi natna lakah hian kan fimkhur a ṭul hle.

"Tupawhin HIV/AIDS hi kan kai thei a, positive-te hi kan en hrang tur a ni lo a, kan hmangaih zawk tur a ni," tiin kal khawmte a chah.

Winter Fest-ah hian a duh apiang tan condom lak theih a ni a, hemi chungchang hi Lalneihzeli Sailo (Temi Sailo), Asst Director - Youth, MSACS & Awareness Campaign chuan a sawifiah.

Zaithiam vanga hriat lar Temi Sailo chuan, "Condom han tih hian kan thlir dan hi a dik lo ṭhin. A nihna takah chuan AIDS dona kawnga kan duh hmasak ber chu sex hman loh a, mahni invawn hi a ni. Chumi thei ngang lo chu mahni kawppui laka rinawm a ni a, heng pahnih thei lo tan hian 'condom' hi a pawimawh chauh.

"Mahni dinhmun hriat hi a pawimawh a, positive tan inenkawl hma hian kan taksaa HIV hrik pung chak tur kan veng thei a, chutihrualin damdawi a awm tawh tih vanga hlauh loh tur a ni lo. HIV hrik hi a hlauhawm a, kan fimkhur a ngai. Valentine's Day te a hnai a, lehkha thiam chinte phei chu kan fimkhur hle tur a ni," tiin a sawi.

Winter Fest-ah hian zirlaiten AIDS an kai nge kai lo hriat nan test an nei a, concert hmangin intihhlimna hun an hmang bawk. IASE hi Republic Venga awm a ni a; helai hmunah hian Bachelor of (B.Ed), Master of Education (M.Ed), Bed Multi Mode Programme, MPhil (Education) leh Ph.D (Education) bakah Certificate Course on Computer Concept (CCC) te a zir theih a ni.