BRIT Awards-ah Harry Styles hming an lam zing

BRIT Awards 2023 chu London-a O2 Arena-ah February 11 khan sem a ni a, Harry Styles bawk a langsar leh ta ber a, award pali lai a pawm haw nawlh!

Kum 29 mi hian Artist of the Year, Album of the Year, Song of the Year leh Best Pop/R+B Act a dawng a, mipa hlang awmna Artist of the Year trophy chu nomination-a lang pha ve lo hmeichhe artist ṭha tak takte tan a hlan thu a sawi.

Beyonce Knowles leh Wet Leg te'n he zan hian award pahnih ve ve an pawm haw bawk.

Kar hmasa lawkah Harry hian "Harrys House" hmangin rimawi lama chawimawina ngaihhlut, Grammys-ah Best Album-ah thlan a lo ni tawh bawk a, tunlai chu chawimawinain a hmuak ti ila kan sawisual awm lo e. "Harrys House" hi English singer-songwriter Harry Styles-a studio album pathumna niin, May 20, 2022 khan tlangzarh a ni a, Billboard 200 album chart-ah vawiin thlenga album hralh tla ber zingah a la lan phak avangin album ṭha danglam bik a ni tih a langchiang awm e.

Kum 2021 khan Best Male leh Best Female awards hi artist zingah inthliar hranna a awm lohna turin paihbo a lo ni tawh a, mahse kuminah erawh category tinah mipa artist-te an chungnung hle a, category 15 zinga 9-ah mipa te'n award an dawng a ni.

BRIT Awards 2023 Winners List:

Album of the Year: Harry Styles - "Harry's House"

Artist of the Year: Harry Styles

Best Group: Wet Leg

Best New Artist: Wet Leg

Song of the Year: Harry Styles - "As It Was"

Best International Artist: Beyonce Knowles

Best International Group: Fontaines D.C.

International Song of the Year:

Beyonce Knowles - "Break My Soul"

Best Alternative/Rock: The 1975

Best Hip-Hop/Grime/Rap: Aitch

Best Dance: Becky Hill

Best Pop/R&B: Harry Styles

Producer of the Year: David Guetta