Amitabh Bachchan-a'n damdawi-in a chhuahsan ta
Bollywood legend, Amitabh Bachchan chuan Covid-19 vanga kar thum chhung damdawi-ina enkawl a nih hnuah Pathianni khan damdawi-in a chhuahsan ta.
Kum 77 mi Amitabh Bachhan leh a fapa Abhishek chu July 11 khan Mumbai-a Nanavati Super Speciality Hospital-ah hripui an kai avang hian dah luh an ni a, kar thum enkawl an nih hnuah Amitabh hi chuan hri a kai tawh lo tih hmuhchhuah niin Pathianni khan damdawi-in aṭang hian an chhuah ta a ni.
Hemi chungchangah hian Amitabh hian a Twitter-ah tarlang nghalin inah a inkhunghran lehnghal thu a sawi a, amah ṭawngṭaipuitu leh thlawptute bakah damdawi-ina uluk taka enkawltute chungah lawmthu a sawi bawk. Abhishek Bachhan erawh damdawi-inah enkawl a la ni a, hetihlai hian a nupui Aishwarya Rai Bachchan leh an fanu kum riat mi Aaradhya-te chu July 27 khan damdawi-in aṭangin an lo chhuahtir tawh bawk a ni.