Khiangte Construction Ṭhazual Lengzem David Darlong "Lenghermawi" A mawi ber!

Khiangte Construction Ṭhazual Lengzem chart tihchhuah tharah; Mizo Idol Season 7-a pathumna, David Darlong-a music video thar ber "Lenghermawii" chuan a chetṭhat chhunzawmin pakhatna a ni ta.

Lenghermawi a mawi ber

Mizo Idol liam taa 'fanbase' nei ṭha ber zinga mi, David Darlong hian ngainatu a ngah a, lawm pawh a hlawh chho viau. A hla thar "Lenghermawi" pawh hi chart-a hmasawn chak pawl tak niin mawi titu an tam tih a rawn tilang. Thla khat liam ta awrh chauha tihchhuah chauh ni chungin, YouTube-ah thlirtu nuai 3 chuang an awm leh der tawh a ni. He hla hi lengzem hla phuah thiam RP-a Ralte phuah niin, Music leh Recording pawh hi amah vêkin a buaipui sak bawk a ni.

Manuna leh Tetea an rawn lang

Hard Ray band aṭanga mipui hriat, Manuna hla thar "Rinmawi" chuan hma rawn sawn zelin pahnihnaah a rawn inhlangkai tawh a, Youth Icon star Tetea Renthlei hla "Bam leh raw! Sek! Sek!" pawhin san lam panin pangana aṭangin a sang pathum zingah a rawn invawrh tawh.

Tute nge lo lang? 

Mizo Idol season 7 top 10 inhlangkai thei Eddie Pachuau pawhin music video "Bawihte" tih chu tichhuakin, panganaah a rawn inlan pui thei a; hla mawi leh 'vibe' pui nuam tak Henry Ro "Solfa" chu top 5 huangah a rawn inhlangkai bawk. Hei bakah hian PC Lalrinsanga, F. Laldinmawii, T. Vanlalhmangaihi, Marina Hriatpuii Ralte leh, Polysphere-te chu chart a rawn lang te an ni.