Super Bowl Halftime Show-ah RIHANNA a rawn 'comeback' turu
America rama infiamna ngaihhlut ber zinga mi, National Football League (NFL) playoff game hnuhnung ber puala ennawm ropui an lantirna, Super Bowl Halftime show chu hun rei tak chhung Pepsi hnuaia neih a nih hnuah Apple Music, NFL leh Roc Nation ten Thawhṭan zing khan a vawi khatna atan Arizona-a State Farm Stadium-ah an huaihawt. Kum sarih chhung zet rimawi huangah thawm lian tak nei loa hun a hman hnuah Rihanna chu ropui takin a rawn 'comeback' leh ta!
Min barakhaih e!
Kum 34 mi Barbarian singer-i'n album a tihchhuah hnuhnung ber chu kum 2016 daih tawh kha a ni a, live performance pawh a nei ngai meuh tawh lo. Fenty hming puin sumdawnna lamah insawrbingin April 2022 khan mihausa tawntaw 'Forbes’ Billionaires List' huangah a lang phak tawh a, hei bakah Riri hi US hmeichhia zingah self-made millionaire naupang ber a lo ni tawh bawk.
Rimawi lamah hun eng emaw chen a chawlh tawh avangin eng angin nge rimawi dawhsan ngaihhlut tak pakhatah hian a rawn let leh dawn, tia an inngaihtuah laiin a entu mipuite chu an rin loh lam daih hmuhtirin, a chhip aṭanga a ke ler thlenga a inthuamna rawng sen, custom jumpsuit Loewe design mawi tak a hak piah lamah a fa pahnihna tur a pai leh chuan ngaihven a hlawh zual hle. Super Bowl Halftime Show-ah rai chunga perform hmasa ber a ni bawk. Rihanna chuan a zai hmaa an kawmnaah, "Ka zainaah tu emaw hruai ka rilruk deuh," tiin mi tam tak chuan musical guest a hruai belh dawn emaw an tih laiin an fa pahnihna a sawina zawk a lo ni daih! Grammy winner leh, a pasal rapper ASAP Rocky-te hian May 2022 khan an fa hmasa ber an lo nei tawh a ni.
Eng hlate nge a sak?
Rihanna chuan "Better Have My Money" hmangin a khuhhawng a, thawm a ṭha nghal hle a, lamthiam rual chevel pawh hmuhnawm tham a ni. RiRi hian minute 14 dawn a perform chhungin mimal leh artist dangte a thawhpuina hla hit 12 chu sa hmanin, a hla chang khatna emaw a thunawn(chorus) chauh emaw a sa a, 'Run This Town', 'All of the Lights' leh, 'Wild Thoughts' lama a thawhpui Jay-Z, Ye leh DJ Khaled hmel hmuhtur awm lo mah se, artist ṭha bik a nihzia rawn pholangin an tel lo pawhin a ngaihnawmin a ninawm hman loh a, khaw dang a hawisan hman meuh lo a ni ber. Nikum Super Bowl-ah khan Hip Hop lama mi bikte'n ropui takin min lamtir tawh a, Rihanna hian kum hmasa lam boruak kha pha chiah lo mah se, rai chung pawha khati khawpa mipui a hip thei khan fak a phu hle.
Rihanna hla sak te:
1. Better Have My Money
2. Where Have You Been
3. Only Girl (In The World)
4. We Found Love
5. Rude Boy
6. Work
7. Wild Thoughts
8. Birthday Cake (instrumental) / Pour It Up
9. All of the Lights
10. Run This Town
11. Umbrella
12. Diamonds
Rihanna'n hlawh a nei dawn lo
Rihanna leh kum danga Super Bowl-a artist inlante hian hlawh an nei ngai lo a, pop stars Beyonce, Bruno Mars, leh Justin Timberlake te pawh khan Riri ang bawk hian hlawh an nei lo. Hei bakah hian, The Weeknd-a'n Super Bowl 2021-a a inlan ṭum khan ama pawisa USD mtd 7 vel zet a seng ral niin an sawi.
Super Bowl hi mipui ṭhahnem tak hmaa inlan theihna hun ṭha a nih avangin hamṭhatna tam tak a kengtel thung tih erawh hriat a ṭha. Kum 2017 Super Bowl-a Lady Gaga inlan hnuah a album hralhchhuah chu nasa takin a pun phah a, Twitter leh Instagram lama followers mtd 250 chuang neitu Rihanna tan pawh a rimawi tharthawhna hun ṭha leh, fans te nena inzawmna thar ṭha zawk a inherchhuah phah theihna tur a nih a rinawm hle. Thawhṭanni zinga Super Bowl kha mi mtd 192 velin an en anga chhut a ni.