Miley Cyrus "Flowers" a la par mawi ; SZA bawkin ro a rel leh ta!

Miley Ray Cyrus studio album pariatna tur "Endless Summer Vacation"-a a lead single 'Flowers' chuan a chetṭhat la chhunzawmin zelin, Hot 100 chart-ah kar li chhung a zawnin pakhatna a ni a, kum 2013-a kar thum chhung No 1 ni thei "Wrecking Ball" record chu a khum ta a ni.

January 13, 2023-a tlangzarh "Flowers" hian record hrang hrang siam chhoin, khawvel huapa chart 40 chuangah pakhatna dinhmun a hauh theih bakah, streaming platform hlun Spotify-ah kar khat chhunga stream nei ngah ber nihnate a lo hauh tawh bawk.

Disney Channel television series 'Hannah Montana' aṭanga mipui hmelhriat hian a kum mil zelin a music kalhmang pawh a rawn thlak chho ve zel a, country singer nu hnap ṭhin kha tunah chuan nula zuanzang leh enghelh nei lo tak angin a rawn inlan tawh tih a MV kalhmang aṭangtein a lang tawh a ni.

Billboard Hot 100 top 5:

1. Miley Cyrus - Flowers

2. SZA - Kill Bill

3. Morgan Wallen - Last Night

4. Sam Smith & Kim Petras - Unholy

5. Metro Boomin ft 21 Savage - Creepin

Adele leh Swift hnungzuitu SZA

Billboard Woman of the Year atana thlan zawh chiah; SZA studio album pahnihna "SOS" chuan kar riat chhung (a zawn ni loin) Billboard 200 chart-ah ro a rel ta. Adele leh Taylor Swift hnua hmeichhe artist zingah kar sarih aia rei No 1 ni leh thei hmasa ber a ni ta.

"SOS: hian kar liam ta khan equivalent unit 1,00,000 chuang a hralhchhuak leh a, Taylor Swift "Folklore" (2020) chu kar riat emaw a aia rei emaw No 1 ni thei hnuhnung ber a ni.

Billboard 200 album chart top 5:

1. SOS - SZA (1,00,000 units)

2. Midnights - Taylor Swift (62,000 units)

3. The Name Chapter: TEMPTATION - TXT (48,000 units)

4. Dangerous: The Double Album - Morgan Wallen (46,000 units)

5. Heroes & Villains - Metro Boomin (45,900 units)