"Magic Mike 3" a chung berah a lám

Channing Tatum leh Salma Hayek channa, Magic Mike trilogy "Magic Mike's Last Dance" chu box office chung berah lamin kar liam ta chhunga sum hailut hnem ber a ni.

R-rated comedy drama film hian kar liam ta chhung khan USD mtd 8.2 chuang lalutin, Super Bowl LVII kara rawn tlazep a nih avangin "Magic Mike" film pathum zingah tlangzarh kara sum lalut tlem ber a ni. Mahse "Last Dance" sum lakluh tlem chhan hi theatre 1,550 chauhah an pekchhuah vang niin a lang.

Khawvel ram 18 aṭangin USD mtd 10.4 vel lalut bawkin, a sum lakluh belhkhawm hi USD mtd 18.6 vel lai chu a tling phak tho a ni.

V-day pualin Titanic 3D version

Channing Tatum-a'n a lamthiamna hmangin hmeichhe tam tak hip thlu thei mah se, Valentines kara thawm rawn nei lian pakhat dang a awm a, chu chu "Titanic" film a ni.

Titanic film kum 25 tlin champha puala 3D version fiah leh felfai zawka tlangzarh nawn leh hian USD mtd 6.4 a lakluh belh a, box office top 10-ah James Cameron chuan a film pahnih, "Avatar 2" leh "Titanic" te a lanpui thei a, mi namai a nih loh zia a rawn tarlang leh.

Box office a reh

Kar liam ta chhung khan film thawm han nei hluai tiha sawi tur a awm lo a, Tom Brady pual film "80 for Brady" chu palinaah a tla thla a, kar hmasa lama pakhatna Dave Bautista "Knock at the Cabin" chu pangana a ni. Hetihlai hian, MCU Phase 5-a film hmasa ber ni tur; February 17-a tlangzarh tura ruahman Disney/Marvel kutchhuak, "Ant-Man and The Wasp: Quantumania" erawh thawm rawn nei lian tura beisei a ni.