CAT exam vawi 3 hlawhchham 'MBA Chai Wala' dintuin Rs. vbc 1 dawn man hu Mercedes a khalh haw

MBA zir chhunzawm tura vawi thum zet a hlawhchham hnua India rama thingpui dawr hmingthang ber pawl ni chho mek, 'MBA Chai Wala' dintu Prafull Billore chuan Rs vaibelchhe 1 dawn man Mercedes-Benz GLE chu a lei a, hei hian mipui ngaihven a hlawhin social media a luahkhat nghal hle. Mercedes-Benz GLE hi variant chi thum, 300d, 400d leh 450 petrol-te awmin Rs nuai 88 aṭanga Rs vbc 1.05 (ex-showroom) man inkarte an ni.

Rs 8,000 in bul a ṭan

Kum 27 mi entrepreneur hian MBA zirzawm tura CAT exam chu vawi thum a paltlang zawh loh hnuah kum 2017 aṭangin IIM Ahmedabad kawtah thingpui dawr 'MBA Chai Wala' chu a chhungte pawisa Rs 8,000 puk chawpin a din a, a sumdawnna lamah a tluang chho ta hle a, chhungkaw rethei tak aṭanga rawn seilianin tunah chuan thingpui zuar chungin millionaire a ni tawh a ni. Tunah hian chawhrualin nitin Rs nuai 1.5 vel lalut angin an inchhut a, thla khatah Rs nuai 45 vel lalut ang a ni. Prafull net worth hi mtd 30 vel bawr anga tarlan a ni bawk.

Ṭhalaite fuihphurtu

Prafull hi thingpui zuartu a nih piahlamah investor leh motivational speaker a ni a, ṭhangtharte fuihphur leh chona thar siamsak tura sawm hlawh ber pawl a ni mek. MBA Chai Wala hi social media lamah pawh a lar chhoh zel tak avangin ram chhunga hmun eng emaw zatah dawr hi a hawng tawh a, India ram khawpui 50 chuangah outlet 200 chuang a nei tawh a ni.

MBA Chai wala YouTube Channel

Kum 2021 aṭang khan Prafull hian YouTube channel-te siamin, a channel hmingah ” Prafull MBA Chai Wala” a vuah. March 19, 2021 khan a motivational video hmasa ber tichhuakin, a hit thei hle. Subscriber mtd 1.64 chuang a nei tawh a ni.

"Hringnun hi i ta a ni a, a hlawhtlinna pawh i kut a ni. Eng nge in ṭhenawmin an tih ngaihtuah lo la. Mi tihlawm tumin hna thawk ngai suh, i tan chauh hna thawk ang che,"

"Dawhthei rawh; hlawhtlinna hian hun a duh rei ṭhin ania,"■