Hmingthanna vangin ka ṭap fo : Gigi Hadid

American supermodel hmingthang, Gigi Hadig chuan Elle Magazine March Issue-a an kawmnaah a hmingthanna avanga a ṭah fo ṭhin thu leh, a nau Bella Hadid nen modeling industry lama chona hrang hrangte vangin therapy an kal mek tih a sawi.

Social media post leh headline hrang hrangah a chhe zawnga a lan vanga a rilru puthmangte tarlangin, "Tiang sawi hian ka phawklek deuh ṭhin," tiin a mittui tla chu a hru thuai a, "Ka thlalak leh kan lak chhante sawifiahna mumal pawh awm loa an duh dan dana an lo her danglam ṭhinte hi hmuh hrehawm tih chang chu ka nei. Ka sawiselnaah erawh min ngaihsak lo hram rawh u," tiin ngui deuh chungin a sawi a ni.

Hadid hian rilru lama a harsatna neihte hi a zep ngai lem lo a, kum 2016 khan anxiety a neih thu a sawi a, a kum lehah “imposter syndrome” a neih thu Vogue in an kawmnaah a sawi lang leh. "Serena Williams khan tihian min hrilh 'Kar thum vel bak kan chanchin hi press mite'n an ngaihven peih tak tak lo' a ti. A chang chuan kan hringnun zawh hi tawp mai tura hriatnate ka nei a, mahse tihsual palh a nih ringin a ral leh mai ka beisei. Mahni inkhawngaihna hi kan paih bo a ngai ka ti hle a, kan thih dawnah meuh chuan kum 19 mi ka nih laia interview hrilhhaithlak deuhte kha ka theihnghilh vek tawh ang," a ti.

September 2020 khan Zayn Malik nena an fa hmasa ber 'Khai' a hring a, Zayn nen kum ruk chhung zet an inzui hnuah kum 2021 khan an inṭhen fel ta a ni. Ngaihzawng nei loa a awm hnuah, nikum September thla khan Leonardo DiCaprio nen sawi zawm zuai ni mah se, December thla a inherchhuah meuh chuan an thawm hi a dai ta hle. Tunah chuan Gigi hi March 3-a Netflix-a tihchhuah tur “Next in Fashion,” season 2 chu Tan France nen co-host turin a inpuahchah mek a ni.