Bruce Willis-a'n thluak lam natna 'Dementia' a nei tih hmuchhuak!

American lemchanthiam hmingthang, Bruce Willis chu March 2022-ah thluak lam natna chi khat 'aphasia' a nei tih an hmuhchhuah hnua a chhungte'n lemchan khawvel a mangṭha a ṭul ta tih an puan aṭanga thla 11 hnu, February 17 khan frontotemporal dementia (FTD) a nei tih an hmuhchhuak leh niin thuchhuah chuan a tarlang.

"Min tih nat hle rualin, a natna chiang zawk kan hriatchhuah theih tak avangin kan ngaih erawh a ngam deuh a ni." tiin Bruce-a nupui Emma Heming Willis chuan chuan a sawi. "FTD hi mi tam zawkin an la hriat ngai zen zen loh natna ṭihbaiawm tak a ni a, tu chungah pawh thleng thei a ni," a ti.

Hollywood pachal kum 67 mi, Bruce Williams hi film 100 chuangah a inlan tawh a, comedy-drama series Moonlighting (1985–1989) aṭangin mipuiin an hmelhriat ṭan a, Die Hard franchise (1988–2013) chu a hming a chherna a ni thung. Golden Globe Award, Primetime Emmy Awards, leh People's Choice Awards a dawng tawh a, kum 2006 khan Hollywood Walk of Fame-ah lakluh a ni. Willis-a channa hian North American box office aṭangin USD tld 3 vel a hailut tawh a, kum 2010 khan leading actor sum lakluh tam lamah pariatna dinhmun lai a hauh phak a ni.

Eng nge FTD chu?

Alzheimer’s Association tarlan danin, FTD hi mihring thluaka frontal lobes (kan chal zawna awm) emaw temporal lobes (kan beng bawr zawna awm) emawa nerve cell chhia leh kal ṭha mumal lo in a thlen a ni. Nerve cell chhiate hian thluaka hmun ṭhenkhat chu a hnathawh anga thawk thei loa siamin, hei hian nungchangahte, miziaahte leh, ṭawng leh midang nena inbiakpawh tawnna kawngah harsatna a thlen ṭhin a ni.

FTD veite hi damdawi hmanga enkawlna chuan an harsatnate hi eng emaw chen a sutkian sak ve thei a, mahse FTD treatment hranpa hi hmuhchhuah a la ni lo. Assosiation chuan damlote tlakhniam dan hi a mihringate a zirin a danglam ve hret hret ṭhin thu an tarlang.