Thailand puka táng chhanchhuah Football captain a thi

Kum 2018 daih tawha Thailand-a thil thleng, puk chhunga tuilian vanga kar hnih chhung zet an tan hnua mipa naupang 12 chhanchhuah zinga pakhat, Wild Boars youth soccer team captain kum 17 mi, Duangphet “Dom” Phromthep chu Thawhlehni khan sponsorship hmanga zirna a chhunzawmna hmun, England-a sports academy-ah lungphuchawlin a thi.

Dom hi Pathianni khan a lehkha zirna hmun, Leicestershire-a Brooke House College Football Academy-ah nikhaw hre loa hmuh a ni a, damdawi-in hnai ber panpui a nih hnuah Thawhlehni khan Thailand-a Zico Foundation chuan a thih thu hi an puang.Dom-a luhna school pawhin a hnuah a thih thu hi an rawn nemnghet zui ve bawk.

Zico Foundation hotu leh, Thai national team captain hlui Kiatisuk Senamuang chuan Dom-a thih chhan hi an hriat mai bik loh thu leh, tunhnaiah pawh a hriselna lamah harsatna a neih an hriat lem loh thu a sawi.

Dom hi Thai province, Chiang Rai-a youth soccer team 'Wild Boars' captain niin, an coach leh a teammate mi 11, kum 11-16 inkarte nen June 2018 khan Tham Luang cave complex an tlawh laiin tuilian vangin puk chhungah hian an tang a ni. An chanchin hian khawvel ngaihven a hlawh nghal vat a, khawvel huapa tuihleuhthiam rualte'n naupang chhanchhuah tumin rescue operation lian tham tak an kalpui hial a ni.

Mipa naupangte hi zan kua zet puk chhungah hian ei leh in tur mumal nei loin an tang a, diver pakhatin tuilian karah an tawmhimna chu vanneihthlak takin a pawh thei ta a, an vai hian him dam taka chhanchhuah niin, puk thim, tawt leh chhengchhe tak aṭanga naupang lachhuak tur hian ni riat chhung hun an hmang leh bawk .

Wild Boars chanchin hi khawvel ram media-te chuan an bawhzui ṭha hle a, film ṭhahnem takah tarlan tel ni tawhin, heng zingah kum 2022-a tihchhuah Ron Howard-a feature film 'Thirteen Lives' leh, 2021 documentary 'The Rescue'-ah te an chanchin hi tarlan a lo ni tawh bawk a ni.